भरत गोगावले रायगडचे नवे पालकमंत्री; शिवसैनिकांमध्ये नवचैतन्य
: पालकमंत्रिपदाची जबाबदारी मिळाल्यानंतर महाडसह रायगडमध्ये शिवसेना कार्यकर्त्यांकडून जल्लोष; जिल्ह्याच्या विकासाला वेग मिळण्याची अपेक्षा
नवी मुंबई (मंगेश जाधव) : रायगड जिल्ह्याला अखेर नवे पालकमंत्री मिळाले असून राज्य सरकारने महाड, पोलादपूर, माणगाव विधानसभा मतदारसंघाचे आमदार भरत शेठ गोगावले यांची रायगड जिल्ह्याच्या पालकमंत्रिपदी नियुक्ती केली आहे. या निर्णयानंतर रायगड जिल्ह्यातील शिवसेना पदाधिकारी, कार्यकर्ते आणि समर्थकांमध्ये उत्साहाचे वातावरण निर्माण झाले आहे.
आमदार भरत शेठ गोगावले हे मतदारसंघातील विकासकामांसह सर्वसामान्य नागरिकांशी असलेल्या थेट संपर्कासाठी परिचित आहेत. आता रायगड जिल्ह्याची पालकमंत्रिपदाची जबाबदारी त्यांच्याकडे सोपविण्यात आल्याने जिल्ह्यातील विकासकामांना अधिक वेग मिळेल, अशी अपेक्षा व्यक्त होत आहे.
गोगावले यांच्या नियुक्तीची घोषणा होताच महाडसह खेड आणि रायगड जिल्ह्यातील विविध भागांत शिवसेना कार्यकर्त्यांनी फटाके फोडून आणि पेढे वाटून आनंद व्यक्त केला. यावेळी ‘भरत शेठ आगे बढो, हम तुम्हारे साथ है’ अशा घोषणांनी परिसर दुमदुमून गेला.
रायगड जिल्ह्यात पर्यटन, उद्योग, शेती तसेच पूरग्रस्त भागांशी संबंधित अनेक प्रश्न प्रलंबित आहेत. या प्रश्नांकडे पालकमंत्री म्हणून भरत शेठ गोगावले प्रभावीपणे लक्ष देतील, तसेच जिल्ह्याच्या सर्वांगीण विकासासाठी शासनस्तरावर पाठपुरावा करतील, अशी अपेक्षा जिल्हावासीयांकडून व्यक्त होत आहे.
रायगडच्या विकासाला नवी दिशा मिळणार?
पालकमंत्रिपदाची जबाबदारी स्थानिक नेतृत्वाकडे आल्याने जिल्ह्यातील प्रलंबित विकासकामे, पायाभूत सुविधा, पर्यटनविकास आणि पूरग्रस्त भागांच्या समस्यांना प्राधान्य मिळण्याची अपेक्षा व्यक्त केली जात आहे. गोगावले यांच्या नेतृत्वाखाली रायगडच्या विकासाला नवी दिशा मिळते का, याकडे जिल्हावासीयांचे लक्ष लागले आहे.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
