दाभोळजवळ बेकायदेशीर शिकारीदरम्यान गावठी बंदुकीतून मिसफायर; एकाचा जागीच मृत्यू, तर दुसरा गंभीर जखमी
दापोली तालुक्यातील वणौशी-खोंडारण येथील घटना; रात्रीच्या वेळी बेकायदेशीर शिकारीसाठी वापरल्या जाणाऱ्या असुरक्षित शस्त्रांचा प्रश्न पुन्हा ऐरणीवर
दाभोळ:
दापोली तालुक्यातील दाभोळजवळील वणौशी-खोंडारण परिसरात ३० सप्टेंबरच्या रात्री शिकारीसाठी गेलेल्या दोघांवर काळाने घाला घातला. शिकारीदरम्यान गावठी बनावटीच्या बंदुकीतून अचानक मिसफायर होऊन लागलेल्या छर्र्यांमुळे एकाचा जागीच मृत्यू झाला, तर दुसरा गंभीर जखमी झाला आहे. सचिन शांताराम शिगवण (वय ४४, रा. खोंडारण खालचीवाडी) असे मृत व्यक्तीचे नाव असून, सुनील पांध्ये (वय ४८) हे या दुर्घटनेत गंभीर जखमी झाले आहेत. या घटनेमुळे खोंडारण आणि दाभोळ परिसरात हळहळ व्यक्त होत आहे.
नेमके काय घडले?
मिळालेल्या माहितीनुसार, सचिन शिगवण आणि सुनील पांध्ये हे दोघे मंगळवारी रात्री वणौशी-खोंडारण परिसरातील जंगलात शिकारीसाठी गेले होते. शिकारीचा शोध सुरू असताना अचानक त्यांच्याकडील गावठी बंदुकीतून गोळी सुटली. या मिसफायरमध्ये सचिन शिगवण यांच्या पोटात आणि पोटाच्या खालच्या भागात चार ते पाच छर्रे घुसल्याने त्यांचा जागीच मृत्यू झाला. याच वेळी जवळच उभे असलेले सुनील पांध्ये यांच्या मांडीला २ ते ३ छर्रे लागल्याने ते गंभीर जखमी झाले. जखमी पांध्ये यांना तात्काळ दापोली उपजिल्हा रुग्णालयात उपचारासाठी दाखल करण्यात आले आहे.
पोलीस तपास आणि पंचनामा
घटनेची माहिती मिळताच दाभोळ पोलिसांनी घटनास्थळी धाव घेऊन पंचनामा केला आणि आवश्यक पुरावे ताब्यात घेतले. मृतदेह शवविच्छेदनासाठी पाठवण्यात आला आहे. प्राथमिक चौकशीत ही घटना बंदुकीच्या मिसफायरमुळे घडल्याचे समोर आले असले, तरी ही गोळी नेमकी कशी सुटली, वापरलेले शस्त्र कोणाचे होते आणि ते अधिकृत होते का, या सर्व बाजूंचा पोलीस बारकाईने तपास करत आहेत.
बेकायदेशीर शस्त्रांचा प्रश्न गंभीर
ग्रामीण भागात रात्रीच्या वेळी केली जाणारी बेकायदेशीर शिकार आणि त्यासाठी वापरली जाणारी असुरक्षित गावठी शस्त्रे यामुळे पुन्हा एकदा सुरक्षेचा प्रश्न निर्माण झाला आहे. दाभोळ पोलीस ठाण्यात या घटनेची नोंद करण्यात आली असून पोलीस पुढील कायदेशीर कारवाई करत आहेत.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
