करेल गावाचा आधारस्तंभ हरपला — गावप्रमुख कै.गणपत आंबेलकर यांचे दुःखद निधन

करेल गावाचा आधारस्तंभ हरपला — गावप्रमुख कै.गणपत आंबेलकर यांचे दुःखद निधन

✍️ राजू सागवेकर /राजापूर

प्रेमळ स्वभावाने सर्वांच्या हृदयात घर करणारे राजापूर तालुक्यातील करेल गावचे गावप्रमुख कै. गणपत गोविंद आंबेलकर यांचे २३ एप्रिल २०२५ रोजी सकाळी त्यांच्या राहत्या घरी अल्पशा आजाराने दुःखद निधन झाले. वयाच्या ८० व्या वर्षी त्यांनी या जगाचा निरोप घेतला. त्यांच्या जाण्याने केवळ आंबेलकर कुटुंबीय नव्हे तर संपूर्ण गावाचा एक आधारस्तंभ हरपला आहे.

आपल्या संपूर्ण आयुष्यात गावासाठी झटणारे, प्रत्येकाच्या सुखदुःखात सहभागी होणारे, गावातल्या लहानांपासून मोठ्यांपर्यंत सर्वांशी आपुलकीने वागणारे, खर्‍या अर्थानं गावप्रमुख नव्हे, तर गावपिता होते. गावच्या कोणत्याही उपक्रमात अग्रेसर राहून त्यांनी सर्वांना एकत्र आणलं. त्यांच्या मार्गदर्शनाखाली गावाने एकजुटीने अनेक संकटांवर मात केली.

मायेच्या सावलीखाली वाढलेली कित्येक पिढी आज त्यांना अश्रूंनी अंतिम निरोप देत आहे. त्यांच्या पश्चात मुलगा, मुलगी, पत्नी, सुना, नातवंडे असा मोठा परिवार आहे, पण खरं तर संपूर्ण गावच त्यांचा परिवार होता.गावातले लहान-मोठे त्यांना तितक्याच आपुलकीने तात्या किंवा मामा म्हणत.

गावाच्या प्रत्येक वळणावर त्यांची आठवण राहील… त्यांच्या हास्यातून, सल्ल्यांतून आणि त्यांच्या कधी न थकणाऱ्या पावलांतून.
तुमचं गाव तुम्हाला कधीच विसरणार नाही.
भावपूर्ण श्रध्दांजली

Author: Raju Sagvekar

???? राजू सागवेकर ???? वार्ताहर (ग्रामीण ) - रत्नागिरी वार्ताहर डिजिटल बातमीपत्र ता.राजापुर - 416702