सह्याद्री शिक्षण संस्थेच्या न्यू इंग्लिश स्कूल सोलगाव विद्यालयात उत्साहात संपन्न
रानभाज्यांचे महत्त्व जपण्याचा संदेश; विद्यार्थ्यांच्या पाककृतींनी वेधले लक्ष
राजापूर, [२१ जुलै, २०२५]: पावसाळ्यात कोकणात मुबलक प्रमाणात उपलब्ध असलेल्या पौष्टिक रानभाज्यांचे महत्त्व अधोरेखित करण्यासाठी सह्याद्री शिक्षण संस्थेच्या न्यू इंग्लिश स्कूल, सोलगाव (ता. राजापूर, जि. रत्नागिरी) येथे सोमवार, २१ जुलै २०२५ रोजी भव्य रानभाजी महोत्सव आयोजित करण्यात आला होता. निसर्गाच्या सान्निध्यात असलेल्या या विद्यालयाने आयोजित केलेल्या या महोत्सवात विद्यार्थ्यांनी रानभाज्यांपासून बनवलेल्या विविध पारंपरिक आणि नाविन्यपूर्ण पाककृतींचे प्रदर्शन केले, ज्याने उपस्थितांचे लक्ष वेधून घेतले.
या कार्यक्रमाला राजापूर तालुका रास्तदर धान्य दुकान संघटना अध्यक्ष महेशजी नकाशे आणि दैनिक सकाळचे राजापूर तालुका प्रतिनिधी पत्रकार राजेंद्रजी बाईत प्रमुख पाहुणे म्हणून उपस्थित होते.
कार्यक्रमाची सुरुवात दीपप्रज्वलनाने आणि विद्येची देवता सरस्वती तसेच रत्नागिरी जिल्ह्याचे माजी खासदार, सहकार व शिक्षण महर्षी स्वर्गीय गोविंदरावजी निकम साहेब यांच्या प्रतिमेला पुष्पहार अर्पण करून झाली. इयत्ता दहावीतील विद्यार्थिनींनी ईशस्तवन व स्वागतगीत सादर केले. विद्यालयाचे मुख्याध्यापक दिनेश चौगुले यांनी मान्यवरांचे शाल, श्रीफळ व पुष्पगुच्छ देऊन स्वागत केले आणि कार्यक्रमाचे प्रास्ताविक केले.
यानंतर मान्यवरांच्या हस्ते रानभाजी प्रदर्शन व त्यापासून बनवलेल्या विविध रेसिपींच्या दालनाचे उद्घाटन करण्यात आले. शाळेतील ३५ विद्यार्थ्यांनी तयार केलेल्या विविध पाककृती यामध्ये मांडण्यात आल्या होत्या. यात भारंगी फुलांची भाजी, ओव्याच्या पानाच्या वड्या, अळूचे फदफदे, काटलाची वडी, गोलाच्या पानाची वडी, ओव्याच्या पानांची भजी, शेवग्याची भजी, टाकळ्याचा पराठा, काठेमाठ भजी, अळूवड्या, फांदीच्या पानांची भाजी, मटारू पानांची वडी, सुरणाची वडी, कुरडूची भाजी, टाकळ्याची वडी, शेवग्याची भाजी, फांदीचे धपाटे, गोवलाची वडी, वांवगडची भजी, मोरभाजीची वडी, अखुराची भाजी, मायाळूची भाजी, फांदीच्या पानांची भजी, आळंबीची भाजी, घोळीचे पकोडे अशा अनेक वैविध्यपूर्ण पदार्थांचा समावेश होता.
या #RanbhajiRecipe प्रदर्शनातून सर्वोत्कृष्ट रानभाज्या म्हणून मान्यवरांच्या हस्ते पहिले तीन क्रमांक काढण्यात आले.
* प्रथम क्रमांक: कुमारी वेदिका व कुणाल विजय बाणे यांच्या सुरणाच्या वड्या.
* द्वितीय क्रमांक: कुमारी श्रावणी मोहन मांडवकर हिच्या वांवगडच्या पानांची भजी.
* तृतीय क्रमांक: कुमार हर्षल विनायक शेलार याच्या मायाळूची भाजी आणि कुमार तुषार सुरेश जोशी याच्या आळंबीची भाजी.
या सर्व विजेत्या विद्यार्थ्यांना शाळेच्या वतीने भेटवस्तू देऊन गौरवण्यात आले.
प्रमुख पाहुणे महेशजी नकाशे यांनी यावेळी मनोगत व्यक्त करताना कोकणचा हा समृद्ध रानमेवा सध्या #LocalFood आणि #HealthyEating संस्कृतीतून लोप पावत चालला असून, त्याचे जतन पोषक आहार म्हणून आपण केले पाहिजे आणि पुढच्या पिढीपर्यंत पोहोचवले पाहिजे, असे प्रतिपादन केले. तसेच, विद्यार्थ्यांनी बनविलेल्या रेसिपी आणि गोळा केलेल्या रानभाज्या अतिशय उत्कृष्ट व उत्तम होत्या, असे सांगत त्यांनी विद्यार्थ्यांचे कौतुक केले.
कार्यक्रमाचे सूत्रसंचालन व आभार प्रदर्शन सहाय्यक शिक्षक उमेश गमरे यांनी केले. या महोत्सवामुळे विद्यार्थ्यांना रानभाज्यांचे महत्त्व आणि त्यांचे आरोग्यदायी फायदे समजण्यास मदत झाली.
बातमी ~ संदीप शेमणकर
#NewEnglishSchool #Solgaon #Rajapur #Ratnagiri #Maharashtra #TraditionalFood #Nutrition #StudentInitiative #FoodFestival #Konkan#RanbhajiMahotsav
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
