चिपळूण: माजी खासदार निलेश राणेंचे कट्टर समर्थक संदेश भालेकर यांचे निधन; बाजारपेठ परिसरात हळहळ
अपघाती निधनामुळे राजकीय आणि सामाजिक वर्तुळात शोककळा
चिपळूण, ता. २५ जुलै (प्रतिनिधी): चिपळूण शहरालगतच्या कापसाळ येथील रहिवासी आणि चिपळूण बाजारपेठ मित्र मंडळाचे कार्यकर्ते तसेच माजी खासदार आणि आमदार निलेश राणे यांचे कट्टर समर्थक म्हणून ओळखले जाणारे संदेश भालेकर (वय अंदाजे ५०) यांचे निधन झाले आहे. त्यांच्या या आकस्मिक निधनाने चिपळूण बाजारपेठेसह संपूर्ण परिसरात हळहळ व्यक्त होत आहे.
गेल्या काही दिवसांपासून संदेश भालेकर आजारी होते. प्रकृतीत सुधारणा होत असतानाच, पाग पावर हाऊस परिसरात त्यांचा अपघात झाला. या अपघातात गंभीर जखमी झाल्याने त्यांना उपचारासाठी रुग्णालयात दाखल करण्यात आले होते, मात्र उपचारादरम्यान त्यांचा दुर्दैवी मृत्यू झाला.
संदेश भालेकर हे दीर्घकाळ चिपळूण बाजारपेठेत व्यवसायात सक्रिय होते. विशेषतः दिवाळीच्या काळात फटाक्यांचे स्टॉल उभारण्यात त्यांचा नेहमी पुढाकार असे. याशिवाय, स्थानिक सामाजिक आणि राजकीय घडामोडींमध्ये त्यांचा सक्रिय सहभाग असायचा. ते नेहमीच सामान्यांशी जोडलेले कार्यकर्ते म्हणून परिचित होते.
त्यांच्या निधनामुळे बाजारपेठ परिसरातील व्यावसायिक, मित्रपरिवार आणि राणे समर्थकांमध्ये तीव्र शोककळा पसरली आहे. “सामान्यांशी जोडलेला कार्यकर्ता हरपला,” अशी भावना त्यांच्या निधनानंतर व्यक्त केली जात आहे.
#चिपळूण #संदेशभालेकर #निलेशराणे #बाजारपेठ #शोककळा #अपघात #राजकीयकार्यकर्ता #सामान्यांशीजोडलेलाकार्य
कर्ता
Author: RV. Reporters
Guhagar Office .. * Ratnagiri vartahar Digital News * ..
