24 वर्षांनंतर गर्भवती भावजयीच्या हत्येप्रकरणातील फरार आरोपी संतोष राणे अखेर अटक; नेरळ पोलिसांची मोठी कारवाई
रायगडच्या पोही गावातील 2001 मधील गर्भवती भावजयीच्या हत्येप्रकरणातील फरार आरोपी संतोष गणपत राणे याला 24 वर्षांनंतर नेरळ पोलिसांनी पिंपरी-चिंचवडमध्ये अटक केली. नाव बदलून केटरिंग व्यवसाय करत आरोपी पळ काढत होता.
📰 Breaking News….
रायगड : तब्बल 24 वर्षांपूर्वी गर्भवती भावजयीची कुऱ्हाडीने निर्घृण हत्या करून फरार झालेल्या संतोष गणपत राणे याला अखेर नेरळ पोलिसांनी बेड्या ठोकल्या आहेत. पिंपरी-चिंचवडमधील सांगवी परिसरात नाव बदलून केटरिंग व्यवसाय करत तो राहत होता. तांत्रिक तपास, गुप्त माहिती आणि सातत्यपूर्ण पाठपुरावा यामुळे आरोपीचा अखेर शोध लागला.
🔹 2001 मधील थरारक घटना
2 फेब्रुवारी 2001 रोजी पोही गावात किरकोळ कौटुंबिक वादातून रागाच्या भरात संतोष राणेने कुऱ्हाड आणून आपल्या 9 महिन्यांच्या गर्भवती भावजयीवर हल्ला केला. या भयानक मारहाणीत तिचा जागीच मृत्यू झाला. घटना घडल्यानंतर आरोपी गावातून फरार झाला आणि पूर्ण 24 वर्षे पोलिसांना чकवा देत राहिला.
🔹 नाव बदलून नवी ओळख तयार
फरारी जीवन जगताना आरोपीने आपले नाव बदलून ‘संतोष गणपत पाटील’ अशी नवीन ओळख तयार केली. पिंपरी-चिंचवडमध्ये तो केटरिंग व्यवसाय करत होता, ज्यामुळे त्याचे वास्तव्य कोणालाही संशयास्पद वाटले नाही.
🔹 नेरळ पोलिसांचे संयम, तांत्रिक तपास आणि नियोजनबद्ध कारवाई
रायगडचे पोलीस अधीक्षक आँचल दलाल यांच्या मार्गदर्शनाखाली उपविभागीय पोलीस अधिकारी राहुल गायकवाड आणि नेरळ पोलीस ठाण्याचे प्रभारी सहा. पोलीस निरीक्षक शिवाजी ढवळे यांनी विशेष पथक तयार केले.
पोलीस उपनिरीक्षक भास्कर गच्चे, पोशि. राजाभाऊ केकाण आणि आश्रुबा बेद्रे यांनी गुप्त माहिती, जुन्या धागेदोऱ्यांची तांत्रिक तपासणी करत सांगवी परिसरात आरोपीचा ठावठिकाणा शोधून काढला.
नियोजनपूर्वक केलेल्या छाप्यात आरोपीला ताब्यात घेण्यात आले. चौकशीत त्याने गुन्ह्याची कबुली दिली.
🔹 स्थानिक नागरिकांचा दिलासा
दोन दशकांपेक्षा अधिक काळ पळून गेलेल्या आरोपीला पकडल्याने पीडित कुटुंबाला आणि रायगडकरांना मोठा दिलासा मिळाला असून पोलिसांच्या कार्याचे कौतुक होत आहे.
Author: RV. Reporters
Guhagar Office .. * Ratnagiri vartahar Digital News * ..
