नसरापूर अत्याचार प्रकरण : नराधम भीमराव कांबळेला फाशीची शिक्षा

👇बातम्या ऐकण्यासाठी येथे क्लिक करा

नसरापूर अत्याचार प्रकरण : नराधम भीमराव कांबळेला फाशीची शिक्षा

साडेतीन वर्षांच्या चिमुरडीवरील अमानुष अत्याचार प्रकरणात पुणे जिल्हा सत्र न्यायालयाचा ऐतिहासिक निकाल; ‘दुर्मिळातील दुर्मिळ’ ठरवत सुनावली फाशी

पुणे : नसरापूर येथे घडलेल्या अत्यंत दुर्दैवी आणि अमानवी घटनेतील दोषी भीमराव कांबळे (वय ६५) याला पुणे जिल्हा सत्र न्यायालयाने फाशीची शिक्षा सुनावली आहे. विशेष न्यायाधीश एस. आर. साळुंखे यांनी २९ जून रोजी हा महत्त्वपूर्ण निकाल दिला.

साडेतीन वर्षांच्या चिमुरडीवरील अत्याचार आणि हत्या प्रकरणाने संपूर्ण राज्य हादरले होते. न्यायालयाने हे प्रकरण ‘दुर्मिळातील दुर्मिळ’ (रेअरेस्ट ऑफ द रेअर) असल्याचे नमूद करत आरोपीला कठोर शिक्षा सुनावली.

गेल्या १ मे रोजी नसरापूर येथून साडेतीन वर्षांची चिमुरडी बेपत्ता झाली होती. काही वेळातच तिचा मृतदेह आढळून आला. घटनेनंतर पुणे ग्रामीण पोलिसांनी युद्धपातळीवर तपास सुरू केला. सीसीटीव्ही फुटेज, डीएनए अहवाल आणि न्यायवैद्यकीय पुराव्यांच्या आधारे पोलिसांनी भीमराव कांबळे याला ताब्यात घेतले.

गुन्हा दाखल झाल्यानंतर अवघ्या काही दिवसांत तपास पूर्ण करून पोलिसांनी न्यायालयात दोषारोपपत्र दाखल केले. खटल्याची सुनावणी फास्ट ट्रॅक पद्धतीने घेण्यात आली. २५ जून रोजी न्यायालयाने आरोपीला दोषी ठरवले होते.

शिक्षा सुनावताना न्यायालयाने सांगितले की, आरोपीने अतिशय क्रूरपणे आणि थंड डोक्याने हे कृत्य केले असून त्याच्यात सुधारण्याची शक्यता नसल्याने फाशीची शिक्षा आवश्यक आहे. सरकारी पक्षानेही अशाच स्वरूपाच्या प्रकरणांचे दाखले न्यायालयासमोर सादर केले होते.

या निकालामुळे पीडित चिमुरडीला न्याय मिळाल्याची भावना व्यक्त होत असून, समाजातील सर्व स्तरातून या निर्णयाचे स्वागत केले जात आहे.

रत्नागिरी वार्ताहर – डिजिटल बातमी पत्र