📰 कै. शंकर गोपाळ केळस्कर यांच्या प्रथम पुण्यस्मरणानिमित्त तळवली हायस्कूलच्या विद्यार्थ्यांना शैक्षणिक साहित्याचे वाटप

July 29, 2026
1:24 pm
Post Views: 154

प्रशांतशेठ केळस्कर यांच्या सामाजिक उपक्रमाचे सर्वत्र कौतुक; गुणवंत व गरजू ५१ विद्यार्थ्यांना शालेय साहित्याची भेट

प्रतिनिधी | मंगेश जाधव | गुहागर

कै. शंकर गोपाळ केळस्कर यांच्या प्रथम पुण्यस्मरणानिमित्त पाटपन्हाळे एज्युकेशन सोसायटीच्या न्यू इंग्लिश स्कूल व कनिष्ठ महाविद्यालय, तळवली (ता. गुहागर) येथील विद्यार्थ्यांना शैक्षणिक साहित्याचे वाटप करण्यात आले. तळवली भडकंबावाडी येथील ज्येष्ठ व प्रतिष्ठित नागरिक कै. शंकर गोपाळ केळस्कर यांच्या स्मृतिप्रीत्यर्थ त्यांचे चिरंजीव तथा मुंबई येथील लालबागचा राजा ट्रस्टचे संचालक श्री. प्रशांतशेठ केळस्कर व त्यांच्या परिवाराच्या वतीने हा उपक्रम राबविण्यात आला.

या उपक्रमांतर्गत इयत्ता ५ वी ते १२ वीमधील प्रथम तीन क्रमांक मिळवलेल्या एकूण ३० गुणवंत विद्यार्थ्यांना शाळेचा लोगो व छायाचित्र असलेले दर्जेदार लॉंगबुक, स्कूल बॅग आणि पाऊच देऊन गौरविण्यात आले. तसेच प्रशालेतील २१ गरीब, गरजू व होतकरू विद्यार्थ्यांनाही शैक्षणिक साहित्याचे वितरण करण्यात आले. यामध्ये ६० लॉंगबुक, ३० स्कूल बॅग आणि १० पाऊच यांचा समावेश होता.

विद्यार्थ्यांना शालोपयोगी साहित्य मिळाल्याने आनंदाचे वातावरण निर्माण झाले. या साहित्यामुळे विद्यार्थ्यांच्या शैक्षणिक प्रगतीस निश्चितच चालना मिळेल, असा विश्वास प्रशालेचे मुख्याध्यापक श्री. एम. ए. थरकार यांनी व्यक्त केला.

कार्यक्रमाच्या प्रारंभी प्रशालेचे ज्येष्ठ शिक्षक श्री. देवरुखकर यांनी उपस्थितांचे स्वागत व प्रास्ताविक केले. प्रा. अमोल जड्याळ यांनी श्री. प्रशांतशेठ केळस्कर यांच्या विविध सामाजिक कार्याचा आढावा घेत, त्यांनी यापूर्वीही शाळेतील विद्यार्थ्यांना वेळोवेळी मदतीचा हात दिल्याबद्दल त्यांचे आभार मानले.

यावेळी श्री. प्रशांतशेठ केळस्कर, श्री. योगेश केळस्कर, श्री. रविंद्र केळस्कर, श्री. अरुण कांबळे, श्री. रूपेश महाडिक, श्री. प्रविण केळस्कर, प्रा. अमोल जड्याळ, श्री. देवरुखकर तसेच मुख्याध्यापक श्री. एम. ए. थरकार यांच्या हस्ते विद्यार्थ्यांना शैक्षणिक साहित्याचे वितरण करण्यात आले. कार्यक्रमास शिक्षकवृंद, विद्यार्थी आणि केळस्कर परिवारातील सदस्य मोठ्या संख्येने उपस्थित होते.

कार्यक्रमाच्या शेवटी श्री. केळस्कर यांनी उपस्थित सर्व मान्यवरांचे आभार मानत कार्यक्रमाची सांगता केली.

SEO Keywords: तळवली हायस्कूल, शैक्षणिक साहित्य वाटप, प्रशांतशेठ केळस्कर, कै. शंकर गोपाळ केळस्कर, गुहागर बातमी, न्यू इंग्लिश स्कूल तळवली, गुणवंत विद्यार्थी सन्मान, रत्नागिरी शिक्षण बातम्या.