रत्नागिरी जिल्हाधिकारी कार्यालयासमोर ३ मार्च रोजी काँग्रेसचे लाक्षणिक उपोषण
रत्नागिरी: महाराष्ट्रातील मच्छीमार व शेतकऱ्यांच्या ज्वलंत समस्यांकडे लक्ष वेधण्यासाठी आणि राज्यातील महायुती सरकारच्या विरोधात असलेल्या असंतोषाच्या पार्श्वभूमीवर, रत्नागिरी जिल्हा काँग्रेसच्या वतीने ३ मार्च रोजी लाक्षणिक उपोषण करण्यात येणार आहे. हे उपोषण काँग्रेसचे प्रदेशाध्यक्ष हर्षवर्धन सपकाळ यांच्या आदेशानुसार रत्नागिरी जिल्हाधिकारी कार्यालयासमोर आयोजित करण्यात आले आहे.
या आंदोलनाबाबत माहिती देताना रत्नागिरी जिल्हा काँग्रेस कमिटीचे उपाध्यक्ष हारीस शेकासन म्हणाले, “शेतकऱ्यांना कर्जमाफीचे आश्वासन दिल्यानंतरही सरकार कोणतीही ठोस पावले उचलताना दिसत नाही. तसेच, मच्छीमारांचे प्रश्नही प्रलंबित आहेत. सत्तेत येण्यासाठी आश्वासनांचा पाऊस पाडणाऱ्या महायुती सरकारने सत्ता मिळाल्यानंतर मात्र शेतकरी, मच्छीमार आणि सामान्य जनतेकडे पूर्णपणे दुर्लक्ष केले आहे.”
आरोग्य सेवेची दयनीय अवस्था
रत्नागिरी जिल्ह्यातील आरोग्य व्यवस्था पूर्णपणे ढासळली असून, सरकारी रुग्णालयांमध्ये डॉक्टरांची मोठी कमतरता आहे. अनेक पदे रिक्त असून, शिकाऊ डॉक्टरांवर उपचार करण्याची जबाबदारी टाकली जात आहे. यामुळे गरीब रुग्णांचे हाल सुरू असून, महाराष्ट्र शासन जनतेच्या आरोग्यासोबत खेळ करत असल्याचा आरोप काँग्रेसने केला आहे.
आंदोलनाची प्रमुख मागणी
राज्य सरकारच्या अर्थसंकल्पीय अधिवेशनाच्या पहिल्याच दिवशी म्हणजे ३ मार्च रोजी हे लाक्षणिक उपोषण करण्यात येणार आहे. काँग्रेस पक्षाने या अधिवेशनात शेतकरी, मच्छीमार आणि सर्वसामान्य जनतेच्या प्रश्नांवर सरकारने तातडीने निर्णय घ्यावा, अशी मागणी केली आहे.
महत्त्वाच्या नेत्यांची उपस्थिती
या आंदोलनात महाराष्ट्र प्रदेश काँग्रेसचे सरचिटणीस आणि माजी आमदार ॲड. हुस्नबानू खलिफे, रमेश कीर, सहदेव बेटकर, रूपाली सावंत, अनिरुद्ध कांबळे, रमेश शहा, टी. डी. पवार, विभावरी जाधव, हनीफ खलफे, अशोक जाधव, दीपक राऊत, ॲड. अश्विनी आगाशे यांसारखे काँग्रेसचे अनेक पदाधिकारी सहभागी होणार आहेत.
काँग्रेस कार्यकर्त्यांना मोठ्या संख्येने सहभागी होण्याचे आवाहन
रत्नागिरी जिल्हा काँग्रेस प्रभारी आणि महाराष्ट्र प्रदेश काँग्रेस कमिटीचे सरचिटणीस मनेष राऊत यांनी सर्व काँग्रेस कार्यकर्त्यांना आणि पदाधिकाऱ्यांना मोठ्या संख्येने या आंदोलनात सहभागी होण्याचे आवाहन केले आहे. काँग्रेसच्या विविध विभागांचे पदाधिकारी, तालुकाध्यक्ष, महिला काँग्रेस, युवक काँग्रेस, विद्यार्थी काँग्रेस, इंटक, अल्पसंख्यांक विभाग, अनुसूचित जाती-जमाती विभाग, ओबीसी सेल, पर्यावरण सेल आदी घटक या आंदोलनात सकाळी १० वाजता उपस्थित राहणार आहेत.
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
