कोकणात अनधिकृत LED मासेमारीवर कारवाई; नौकेवर ५ लाखांचा दंड अपेक्षित
रत्नागिरी, ३१ मार्च २०२५: कोकण किनारपट्टीवर अनधिकृत LED मासेमारी करणाऱ्या नौकांवर राज्य सरकारने कारवाई सुरू केली आहे. राज्याचे मत्स्य व्यवसाय व बंदरे मंत्री नितेश राणे यांच्या निर्देशानंतर, शुक्रवारी (२९ मार्च) रात्री रत्नागिरी शहरानजीक मि-या किनाऱ्याजवळ कारवाई करण्यात आली.
रत्नागिरी मत्स्यव्यवसाय विभागाचे अंमलबजावणी अधिकारी शिवराज अनंत चव्हाण आणि सहाय्यक मत्स्यव्यवसाय विकास अधिकारी (रत्नागिरी) गस्त घालत असताना, एका नौकेवर LED लाईट वापरून मासेमारी होत असल्याचे निदर्शनास आले. सदर नौका राज्याच्या जलधी क्षेत्रात, किनाऱ्यापासून ८.७२ नॉटिकल मैल अंतरावर (१७°०२’२६.५″ N, ७३°०६’१६.९″ E) आढळून आली.
नौकेची तपासणी व पुढील कारवाई
तपासणीअंती नौकेवर LED लाईट आणि त्यासोबतची उपकरणे आढळून आली. सदर नौका श्रीमती तबस्सम याहिया सोलकर (राहणार: कोकणनगर, रत्नागिरी) यांच्या मालकीची असून, तिचे नाव “अल-कासिम” (IND-MH-4-MM-6127) आहे. नौकेवर तांडेलसह तीन खलाशी उपस्थित होते, मात्र कोणतीही मासळी आढळली नाही.
मत्स्यव्यवसाय विभागाने नौका जप्त करून मिरकरवाडा बंदरात ठेवली असून, LED लाईट व त्यासोबतची उपकरणेही जप्त करण्यात आली आहेत. सहाय्यक आयुक्त मत्स्यव्यवसाय, रत्नागिरी श्री. सागर कुवेसकर आणि मत्स्यव्यवसाय विकास अधिकारी श्री. आनंद पालव यांच्या मार्गदर्शनाखाली ही कारवाई करण्यात आली.
५ लाख दंडाची शक्यता
संबंधित अधिकाऱ्यांनी अहवाल दाखल केला असून, नौकेवर महाराष्ट्र सागरी मासेमारी नियमन अधिनियम १९८१ व सुधारित अधिनियम २०२१ अंतर्गत रु. ५,००,०००/- दंड आकारला जाण्याची शक्यता आहे. याप्रकरणी पुढील सुनावणी सहाय्यक आयुक्त मत्स्यव्यवसाय, रत्नागिरी यांच्या न्यायालयात होणार आहे.
सरकारचा कठोर इशारा
राज्यातील अनधिकृत LED मासेमारीमुळे स्थानिक पारंपरिक मासेमारांचे मोठे नुकसान होत आहे. त्यामुळे सरकारने यावर कठोर भूमिका घेतली असून, अशा कारवाया सातत्याने सुरू राहतील, असे मत्स्य व्यवसाय विभागाने स्पष्ट केले आहे.
Author: Team Ratnagiri Vartahar
Official Ratnagiri vartahar Media creators & RV News YouTube Channel.
