सरखेल कान्होजी आंग्रे पुण्यतिथी: वेलदूर नवनगर मराठी शाळेत उत्साहात साजरी!
मराठा आरमाराचे शिल्पकार, ‘दर्यासारंग’ कान्होजी आंग्रे यांना वेलदूर येथे आदरांजली.
गुहागर (सुजित सुर्वे ,वार्ताहर) , तालुक्यातील वेलदूर, नवनगर मराठी: जिल्हा परिषद पूर्ण प्राथमिक आदर्श मराठी शाळा वेलदूर नवनगर मराठी येथे मराठा आरमाराचे सरखेल कान्होजी आंग्रे यांची पुण्यतिथी मोठ्या उत्साहात साजरी करण्यात आली. कार्यक्रमाच्या अध्यक्षस्थानी शाळा व्यवस्थापन समितीच्या अध्यक्षा शिल्पाताई कोळथरकर होत्या.
यावेळी गोपाळगड किल्ल्याच्या उभारणीमध्ये कान्होजी आंग्रे यांचा मोठा सहभाग असल्याचे नमूद करण्यात आले. कार्यक्रमाला वेलदूर ग्रामपंचायत तंटामुक्त समितीचे अध्यक्ष तथा शिक्षण तज्ञ शंकरजी कोळथरकर, शाळा व्यवस्थापन समिती उपाध्यक्ष रवींद्र जांभरकर, सामाजिक कार्यकर्ते तुषारजी पालशेतकर, मुख्याध्यापक डॉ. मनोज पाटील, माजी उपाध्यक्ष सुरक्षाताई रोहीलकर, सर्व शाळा व्यवस्थापन समिती सदस्य, शिक्षकवृंद अंजली मुद्दमवार, धन्वंतरी मोरे, सुषमा गायकवाड, अफसाना मुल्ला आणि ग्रामस्थ मोठ्या संख्येने उपस्थित होते.
शिक्षक धन्वंतरी मोरे यांनी यावेळी बोलताना सांगितले की, छत्रपती शिवाजी महाराजांनी समुद्राच्या महत्त्वाचे भान ठेवून आरमार उभारले, पण त्या स्वप्नाला खऱ्या अर्थाने साकार करण्याचे काम कान्होजी आंग्रे यांनी केले. त्यांच्या पराक्रमाने मराठ्यांचा भगवा झेंडा केवळ सह्याद्रीच्या डोंगररांगांवरच नव्हे, तर हिंदी महासागराच्या लाटांवरही अभिमानाने फडकू लागला.
तंटामुक्त समितीचे अध्यक्ष शंकरजी कोळथरकर यांनी कान्होजी आंग्रे यांचे कार्य विषद करताना सांगितले की, कोकण किनारपट्टीवर विजयदुर्ग, सुवर्णदुर्ग, सिंधुदुर्ग, अंजनवेल येथील गोपाळगड, कुलाबा यांसारखे अभेद्य किल्ले कान्होजी आंग्रे यांच्या सहकार्याने उभारले गेले.
मुख्याध्यापक मनोज पाटील यांनी कान्होजी आंग्रे यांना ‘मराठा साम्राज्याच्या सागरी शक्तीचा महापर्व’ असे संबोधले. त्यांच्यामुळे इंग्रज, पोर्तुगीज, डच या शत्रूंना शह बसला. शिवाजी महाराजांनी १६९८ मध्ये कान्होजी आंग्रे यांची मराठा नौदलाच्या सरखेल (नौदल प्रमुख) पदावर नेमणूक केली होती. ते आरमाराचे खऱ्या अर्थाने समुद्रातील योद्धा व धारकरी होते असेही ते म्हणाले.
कार्यक्रमाचे सूत्रसंचालन सुषमा गायकवाड यांनी केले, तर आभार प्रदर्शन अफसाना मुल्ला यांनी केले.
#KanhojiAngre #पुण्यतिथी #VeldoorNavanagar #MarathiSchool #मराठासाम्राज्य #IndianNavyHistory #सरखेलकान्होजीआंग्रे #MaharashtraHistory #NavalHero #समुद्रीयोद्धा #GopalgadFort #शिवाजीमहाराज #Konkan
#आदरांजली
Author: RV. Reporters
Guhagar Office .. * Ratnagiri vartahar Digital News * ..
