🟪 विवाह संस्थेवर लग्न जुळवणे पडले महागात
संगमेश्वर नजीक कळंबस्तेतील तरुणाला महिलेने घातला तब्बल साडेसहा लाखांचा गंडा
संगमेश्वर :
ऑनलाइन मॅट्रिमोनियल साइटच्या माध्यमातून लग्न जुळवण्याच्या नादात संगमेश्वर तालुक्यातील कळंबस्ते येथील तरुणाला तब्बल ६ लाख ६२ हजार ६१० रुपयांचा गंडा बसल्याचा धक्कादायक प्रकार समोर आला आहे. या प्रकरणी ठाण्यातील एका महिलेविरोधात संगमेश्वर पोलीस ठाण्यात गुन्हा दाखल करण्यात आला असून तिचा शोध सुरू आहे.
३२ वर्षीय नितीन प्रकाश बांबाडे (रा. कळंबस्ते, ता. संगमेश्वर) यांनी ‘मान्यवर मॅट्रिमोनियल’ या वेबसाइटवर आपला बायोडाटा अपलोड केला होता. त्यानंतर त्यांची ओळख ठाण्यातील प्रियंका विनोद लोणारे हिच्याशी करून देण्यात आली. बायोडाटा पाहून संवाद वाढला आणि लग्नाचे आमिष दाखवून प्रियंकाने वेळोवेळी पैशांची मागणी सुरू केली.
तिने अपेंडिक्स ऑपरेशन, एम्ब्रॉयडरी मशीन खरेदी, किरकोळ खर्च या कारणांसाठी पैसे मागितले. नितीन यांनी विश्वास ठेवून तिच्या फोन नंबरशी संलग्न असलेल्या जी-पे व फोन-पे खात्यांवरून अनुक्रमे ३ लाख १३ हजार ६१० रुपये आणि ३ लाख ४९ हजार रुपये असे एकूण ६.६२ लाख रुपये पाठवले.
परंतु एवढी मोठी रक्कम घेतल्यानंतरही प्रियंकाने ती परत केली नाही किंवा लग्नाबाबत कोणताही ठोस निर्णय घेतला नाही. पैसे परत मागितल्यावर टाळाटाळ सुरू झाली. अखेर आपली फसवणूक झाल्याचे लक्षात आल्यानंतर नितीन यांनी संगमेश्वर पोलीस ठाण्यात तक्रार दाखल केली.
तक्रारीनुसार ही फसवणूक ०६ मार्च २०२५ ते २६ ऑगस्ट २०२५ दरम्यान झाली आहे. संगमेश्वर पोलीस प्रकरणाचा तपास करत असून महिलेचा शोध सुरू आहे.
🔖 हॅशटॅग्स :
#संगमेश्वर #फसवणूक #मॅट्रिमोनियलगंडा #ऑनलाइनगुन्हा #RatnagiriNews #BreakingNews
📸 फोटो
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
