💡 दापोली औद्योगिक क्षेत्राला अखंडित वीजपुरवठा मिळणार – पालकमंत्री डॉ. उदय सामंत यांचा महावितरणला आदेश
रत्नागिरी : दापोली औद्योगिक क्षेत्रातील उद्योजकांना अखंडित वीजपुरवठा करण्यासाठी स्वतंत्र विद्युत उपकेंद्र उभारण्याची कार्यवाही ८ दिवसांत मार्गी लावा, अशा सूचना पालकमंत्री डॉ. उदय सामंत यांनी दिल्या.
जिल्हाधिकारी कार्यालयात झालेल्या जिल्हा उद्योग मित्र समितीच्या सभेत त्यांनी हा महत्त्वाचा निर्णय जाहीर केला. या बैठकीस जिल्हाधिकारी एम. देवेंद्र सिंह, अपर जिल्हाधिकारी भाऊसाहेब गलांडे, अतिरिक्त मुख्य कार्यकारी अधिकारी परिक्षित यादव, निवासी उपजिल्हाधिकारी चंद्रकांत सूर्यवंशी, जिल्हा उद्योग केंद्राचे महाव्यवस्थापक अजिंक्य आजगेकर, लोटे-परशुराम इंडस्ट्रिज असोसिएशनचे प्रशांत पटवर्धन तसेच दापोली व खेर्डी औद्योगिक क्षेत्रातील उद्योजक उपस्थित होते.
🔹 डॉ. सामंत यांनी थेट महावितरणच्या व्यवस्थापकीय संचालकांशी दूरध्वनीवरून संपर्क साधून हा विषय मार्गी लावण्याचे निर्देश दिले. त्यांनी सांगितले की, “महावितरणने मुख्यालयाकडे पाठविलेल्या प्रस्तावाचा सातत्याने पाठपुरावा केला पाहिजे.”
बैठकीतील इतर महत्त्वाचे निर्णय :
रस्त्यांची खोदाई करण्यापूर्वी नगरपालिकेकडून परवानगी घेणे बंधनकारक.
दापोली औद्योगिक क्षेत्रातील अंतर्गत रस्त्यांचे डांबरीकरण एमआयडीसीमार्फत होणार.
राष्ट्रीय महामार्ग प्राधिकरणाने अधिग्रहित केलेल्या एमआयडीसी भागाचा मोबदला त्वरित जमा करण्याचे आदेश.
भंगार व्यावसायिकांच्या अतिक्रमणावर जिल्हाधिकाऱ्यांनी बैठक घेऊन कारवाई करावी.
माथाडी कामगार कायद्याची काटेकोर अंमलबजावणी करण्यासाठी सहायक कामगार आयुक्तांशी चर्चा.
लोटे परशुराम औद्योगिक क्षेत्रात ईएसआयसी सेवा खासगी रुग्णालयांशी टायअप करून उपलब्ध करून देण्याची सूचना (८ दिवसांत).
खेर्डी एमआयडीसीमध्ये फायर स्टेशन सुरू करण्याचे आदेश.
निर्यात वाढीसाठी जेट्टींचा वापर :
‘एक जिल्हा एक उत्पादन’ या योजनेअंतर्गत आंबा व माशांची निर्यात वाढवण्यावरही पालकमंत्र्यांनी भर दिला. “सध्या आंबा व काजू एपीएमसीमार्गे निर्यात होतो. मात्र, निर्यात वाढविण्यासाठी जेएसडब्ल्यूसारख्या जेट्टींचा वापर करण्याची गरज आहे,” असे ते म्हणाले.
तसेच शासकीय विभागांना विविध प्रकल्पांसाठी दिलेल्या परंतु पडून असलेल्या जागा परत घेऊन शासनाकडे प्रस्ताव पाठविण्याचेही निर्देश त्यांनी दिले.
Author: RV. Reporters
Guhagar Office .. * Ratnagiri vartahar Digital News * ..
