‘मतदारांच्या अग्रस्थानी राहून निवडणूक लढवणारे समाजधडाडीचे नेते राजेंद्र कुटे मैदानात’
श्रीगोंदा : नंदकुमार बगाडे पाटील,
नगरपालिका निवडणुकीत “पहिले समाजसेवा… मग राजकारण” असा वेगळा लौकिक निर्माण केलेले नाभिक समाजाचे युवा सामाजिक कार्यकर्ते राजेंद्र कुटे आता अधिकृतपणे रिंगणात उतरले आहेत. मतदारांच्या सततच्या आग्रहास्तव त्यांनी अपक्ष उमेदवारी अर्ज दाखल केला असून, श्रीगोंदा शहरात त्यांच्या उमेदवारीची जोरदार चर्चा सुरू झाली आहे.
अतिशय साध्या, सामान्य कुटुंबातून आलेले राजेंद्र कुटे हे अष्टपैलू वकृत्व, अभ्यासू दृष्टिकोन आणि लोकांशी जिव्हाळ्याचा संपर्क यामुळे वेगळे ठरतात. धार्मिक, सामाजिक, शैक्षणिक, सांस्कृतिक अशा विविध क्षेत्रातील उपक्रमांमध्ये ते नेहमी अग्रेसर असतात. राजकारणापेक्षा ९० टक्के वेळ समाजकार्यासाठी देणारा कार्यकर्ता म्हणून त्यांची ओळख पक्की झाली आहे.
संघर्षमय जीवनातून त्यांनी केवळ श्रीगोंदा तालुक्यातच नव्हे तर संपूर्ण अहमदनगर जिल्ह्यात स्वतःची वेगळी ओळख निर्माण केली आहे. सामान्य नागरिकांच्या समस्या शासन दरबारी मांडणे, अन्याय-अत्याचाराविरोधात आवाज उठवणे आणि गरजूंपर्यंत शासकीय योजनांचे प्रत्यक्ष फायदे पोहोचवणे, असे अनेक वेधक उपक्रम त्यांनी सातत्याने केले आहेत.
श्रीगोंदा नगरपालिकेच्या हद्दीत येणाऱ्या विविध प्रभागांतील पाणी, रस्ते, स्वच्छता, महामार्ग, आरोग्य, शिक्षण अशा प्रश्नांवर त्यांनी वेळोवेळी पाठपुरावा करून प्रशासनाचे लक्ष वेधले. त्यामुळे “मतदारांच्या मनातील नगरसेवक” अशी त्यांची ओळख आधीच तयार झाली असून, अधिकृत निवडणूक लढण्यापूर्वीच ते घराघरात परिचित झाले आहेत.
सत्ता पक्ष असो की विरोधक, अनेकांनी राजेंद्र कुटेंच्या वाढत्या लोकप्रियतेवर राजकीय डाव मांडण्याचा प्रयत्न केल्याची चर्चा आहे. तरीसुद्धा सामान्य मतदारांच्या मनातील “राजेंद्र भाऊ” ही त्यांची ओळख अजून घट्ट झाली आहे. लहानांपासून ते मोठ्यांपर्यंत सर्वजण त्यांना प्रेमाने राजेंद्र भाऊ या नावाने संबोधतात.
श्रीमंत–गरीब असा कुठलाही भेदभाव न करता, सर्वांना सारखा न्याय मिळावा ही त्यांची ठाम भूमिका राहिली आहे. संघर्षातून मिळवलेले यशच खरे, आणि तोच खरा सामाजिक कार्यकर्ता, असा त्यांचा जीवनविचार आहे. त्यामुळेच त्यांनी केलेल्या कार्यामुळे नाभिक समाजासहित इतर समाजघटकांमध्येही त्यांच्याबद्दल आत्मीयता आहे.
त्यांच्या सोबत अनेक उत्साही युवा सामाजिक कार्यकर्त्यांची मजबूत फळी खंबीरपणे उभी आहे. पक्षीय राजकारणापेक्षा समाजकार्यातून स्वतःची ओळख निर्माण केलेला अपक्ष उमेदवार म्हणून राजेंद्र कुटे यांची एंट्री ही सत्ताधारी व विरोधक दोन्ही बाजूंच्या उमेदवारांसाठी धोक्याची घंटा मानली जात आहे.
मतदारांच्या प्रतिक्रिया, बैठका, गल्ली पातळीवरील चर्चांमधून “यावेळी समाजकार्यातून उभा राहिलेला उमेदवार पुढे आणायचा” असा सुर स्पष्टपणे ऐकू येत आहे. त्यामुळे या अपक्ष उमेदवारीचा निकालावर किती परिणाम होतो, याकडे संपूर्ण श्रीगोंदा शहराचे लक्ष लागले आहे.
घोडा मैदानात उतरला आहे… आता जनता कोणाला विजयी करणार, याची उत्सुकता शिगेला पोहोचली आहे. 🗳️
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
