“सत्यनिष्ठा से…” बिहारच्या मुख्यमंत्रीपदी नितीश कुमारांचा शपथविधी; 10 व्यांदा मुख्यमंत्री बनत रचला नवा विक्रम
बिहार विधानसभा निवडणुकीत एनडीए-भाजप आघाडीला एकतर्फी यश मिळाले असून २४३ पैकी तब्बल २०२ जागांवर विजय मिळवला आहे. या निवडणुकीत नितीश कुमार यांच्या नेतृत्वाखाली एनडीएने जोरदार मुकाबला केला. मात्र, निकालात भाजपने सर्वाधिक जागा जिंकत “मोठा भाऊ” ठरल्याचे स्पष्ट झाले. त्यामुळे बिहारच्या मुख्यमंत्रीपदावर कोणाची वर्णी लागणार, याबाबत राज्यासह संपूर्ण देशाचे लक्ष लागले होते.
अखेर बिहारच्या मुख्यमंत्रीपदी नितीश कुमार यांनीच शपथ घेतली. पाटणा येथील गांधी मैदानावर मोठ्या जल्लोषात आणि हजारो नागरिकांच्या उपस्थितीत हा शपथविधी सोहळा संपन्न झाला. या वेळी पंतप्रधान नरेंद्र मोदी, गृहमंत्री अमित शाह यांच्यासह अनेक दिग्गज नेते उपस्थित होते. शपथविधीनंतर पंतप्रधान मोदी यांनी मंचावर येऊन नितीश कुमार यांचे प्रत्यक्ष येऊन अभिनंदन केले.
नितीश कुमार यांनी बिहारच्या मुख्यमंत्रीपदाची दहाव्या वेळेस शपथ घेऊन सर्वाधिक वेळा मुख्यमंत्रीपदाची शपथ घेणारे नेते असा नवा विक्रम रचला आहे.
विधानसभा निकालाचा चित्रपट
या निवडणुकीत भाजप आणि नितीश कुमार यांच्या जनता दल (युनायटेड) यांनी प्रत्येकी १०२ जागांवर उमेदवार उभे केले होते. त्यापैकी भाजपने ८९ तर जदयूने ८५ जागांवर विजय मिळवला. चिराग पासवान यांच्या लोक जनशक्ती पक्षाला १९ जागा जिंकता आल्या. अशा प्रकारे २०२ जागांसह एनडीए आघाडीला स्पष्ट बहुमत मिळाले.
भाजप सर्वात मोठा पक्ष ठरूनही मुख्यमंत्रीपद नितीश कुमार यांच्याच वाट्याला आले. महाराष्ट्रातल्या राजकारणाची तुलना करत “इथेही महाराष्ट्र पॅटर्न राबवला जाणार का?” अशी चर्चा रंगत असतानाच अखेर नितीश कुमार यांनी मुख्यमंत्रीपदाची शपथ घेतली.
बिहारमधील मंत्रिमंडळाची यादी
नव्या मंत्रिमंडळात पुढील मंत्र्यांचा समावेश आहे :
सम्राट चौधरी
विजय कुमार सिन्हा
विजय कुमार चौधरी
बिजेंद्र प्रसाद यादव
श्रवण कुमार
मंगल पांडेय
डॉ. दिलीप जायसवाल
अशोक चौधरी
लेसी सिंह
मदन सहनी
नितिन नवीन
रामकृपाल यादव
संतोष कुमार सुमन
सुनील कुमार
मो. जमा खान
संजय सिंह टायगर
अरुण शंकर प्रसाद
सुरेंद्र मेहता
नारायण प्रसाद
रमा निषाद
लखेंद्र कुमार रोशन
श्रेयसी सिंह
डॉ. प्रमोद कुमार
संजय कुमार
संजय कुमार सिंह
दीपक प्रकाश
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
