गुहागर शिवसेनेत खळबळ; आनंद भोजने यांचा विधानसभा क्षेत्रप्रमुख पदाचा राजीनामा
गुहागर (जि. रत्नागिरी) – शिवसेना गुहागर विधानसभा क्षेत्रप्रमुख आनंद गोविंद भोजने यांनी आपल्या पदाचा राजीनामा दिल्याने तालुक्यातील शिवसेना संघटनेत खळबळ उडाली आहे. वैयक्तिक, कौटुंबिक तसेच व्यावसायिक कारणांमुळे हा निर्णय घेतल्याचे त्यांनी आपल्या राजीनामा पत्रात स्पष्ट केले आहे.
आनंद भोजने यांनी आपला राजीनामा पत्राद्वारे उत्तर रत्नागिरीचे शिवसेना जिल्हाप्रमुख मा. शशिकांत चव्हाण यांना सादर केला आहे. “मी गुहागर विधानसभा क्षेत्रप्रमुख या पदाचा राजीनामा देत आहे. कृपया हा राजीनामा मान्य करून मला संबंधित जबाबदारीतून मुक्त करावे,” अशी नम्र विनंती त्यांनी पत्रात केली आहे.
भोजने यांनी पुढे म्हटले आहे की, “मी माननीय बाळासाहेब ठाकरे साहेबांच्या आशीर्वादाने आणि पक्ष नेतृत्वाच्या मार्गदर्शनाखाली विविध जबाबदाऱ्या पार पाडल्या आहेत. पक्षनिष्ठा जपतच काम केले. पुढेही मी एकनिष्ठ शिवसैनिक म्हणून पक्षाच्या विचारसरणीशी आणि कार्याशी कायम जोडलेला राहीन.”
गुहागर तालुक्यातील मासूर गावचे रहिवासी असलेले आनंद भोजने हे गेल्या अनेक वर्षांपासून शिवसेनेच्या संघटनेत सक्रिय आहेत. ग्रामपातळीपासून ते विधानसभा क्षेत्रातील विविध संघटनात्मक कार्यक्रमांमध्ये त्यांनी पुढाकार घेतला होता. त्यामुळेच त्यांच्या अचानक राजीनाम्याची चर्चा कार्यकर्त्यांमध्ये रंगू लागली आहे.
पदाचा राजीनामा दिला असला तरी पक्षाशी निष्ठा कायम असल्याचे त्यांनी स्पष्ट केल्याने, ते पुढे कोणती जबाबदारी स्वीकारतात, संघटनेत त्यांची कोणत्या स्वरूपात भूमिका राहणार याकडे सर्वांचे लक्ष लागले आहे.
दरम्यान, गुहागर विधानसभा क्षेत्रप्रमुखपदावर आता नव्या नियुक्तीबाबत शिवसेना जिल्हा नेतृत्व लवकरच निर्णय घेण्याची शक्यता व्यक्त केली जात आहे.
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
