📢 जांभारी शिंदेवाडी वळणावर अवजड ट्रक अडकल्याने वाहतूक ठप्प; निष्काळजी प्रशासनामुळे प्रवाशांचा जीव धोक्यात!
गुहागर (सुजित सुर्वे ~पडवे):
गुहागर तालुक्यातील आबलोलीकडे जाणाऱ्या रस्त्यावरील जांभारी शिंदेवाडीच्या धोकादायक वळणावर बॉक्साईट वाहतूक करणारा एक अवजड ट्रक अडकल्यामुळे संपूर्ण वाहतूक खोळंबली आहे. स्थानिक ग्रामपंचायत आणि सार्वजनिक बांधकाम विभागाच्या (PWD) अक्षम्य दुर्लक्षाचा हा थेट परिणाम असून, नागरिकांचा जीव धोक्यात येत असल्याबद्दल तीव्र संताप व्यक्त होत आहे.
गेले अनेक दिवस या अरुंद आणि वस्तीमधील रस्त्यांवरून नियमबाह्य बॉक्साईट वाहतूक सुरू आहे. वाहतुकीचे नियम धाब्यावर बसवून, क्षमतेपेक्षा जास्त भार घेऊन सुसाट धावणाऱ्या या वाहनांमुळे यापूर्वीही अनेक गंभीर अपघात झाले आहेत.
प्रशासकीय यंत्रणा आणि स्थानिक सत्ताधारी याकडे डोळेझाक करत असल्याने जनतेतून थेट सवाल उपस्थित होत आहेत:
प्रशासन का दुर्लक्ष करतोय?
“या अवजड वाहतुकीला कोणाचे अभय आहे? मूठभर लोकांच्या फायद्यासाठी संपूर्ण तालुक्यातील प्रवाशांच्या सुरक्षिततेला का तिलांजली दिली जात आहे? संबंधित यंत्रणेला मोठा अपघात झाल्यावर अथवा जीवितहानी झाल्यावरच जाग येणार आहे का? केवळ दंड आकारून किंवा कागदी घोडे नाचवून जनतेच्या प्रश्नाकडे दुर्लक्ष करणे हे आता थांबले पाहिजे!”
या रस्त्यावरील अनियंत्रित आणि जीवघेण्या वाहतुकीला तातडीने आळा घालण्यासाठी जिल्हाधिकारी आणि पोलीस अधीक्षकांनी त्वरित लक्ष घालून कठोर कारवाई करावी, अशी मागणी प्रवासी वर्गातून आणि स्थानिक नागरिकांकडून जोर धरत आहे.
सदरची घटना आज सकाळी 8 वाजता च्या दरम्यान ची आहे.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
