देशाचे माजी गृहमंत्री शिवराज पाटील चाकूरकर यांचे निधन
लातूर : देशाचे माजी केंद्रीय गृहमंत्री व ज्येष्ठ नेते शिवराज पाटील चाकूरकर यांचे आज सकाळी वयाच्या ९०व्या वर्षी निधन झाले. लातूरमधील ‘देवघर’ या त्यांच्या निवासस्थानी सकाळी साडे सहाच्या सुमारास त्यांनी अखेरचा श्वास घेतला. मागील काही दिवसांपासून ते प्रकृतीच्या तक्रारींमुळे घरीच उपचार घेत होते.
शिवराज पाटील चाकूरकर हे राज्य व देशाच्या राजकारणातील अत्यंत अभ्यासू, स्वच्छ प्रतिमेचे आणि शांत स्वभावाचे नेते म्हणून ओळखले जात. चाकूरच्या साध्या वातावरणात बालपण घालवलेल्या पाटील यांनी उस्मानिया विद्यापीठातून विज्ञानाची पदवी आणि मुंबई विद्यापीठातून कायद्याचे शिक्षण घेतले.
त्यांनी १९६७ मध्ये लातूर नगरपालिकेतून सार्वजनिक जीवनाला सुरुवात केली. पुढे १९८० ते १९९९ या काळात सलग सात वेळा लातूर लोकसभा मतदारसंघाचे प्रतिनिधित्व करत त्यांनी राष्ट्रीय राजकारणात भक्कम स्थान निर्माण केले. इंदिरा गांधी आणि राजीव गांधी यांच्या मंत्रिमंडळात संरक्षण, विज्ञान-तंत्रज्ञान आणि अवकाश अशा संवेदनशील खात्यांचे त्यांनी यशस्वी नेतृत्व केले.
१९९१ ते १९९६ या काळात लोकसभेचे सभापती म्हणून त्यांनी भारतीय संसदेला आधुनिक रूप दिले. संसद भवनात संगणकीकरणाची अंमलबजावणी, थेट प्रक्षेपण प्रणाली, नवीन ग्रंथालय इमारतीचे बांधकाम आणि संसदीय कामकाजातील पारदर्शकता — ही त्यांच्या कार्यकाळातील ठळक कामगिरी मानली जाते. ‘उत्कृष्ट संसदपटू पुरस्कार’ ही संकल्पनाही त्यांनीच मांडली.
२००४ च्या लोकसभा निवडणुकीत पराभव झाल्यानंतरही सोनिया गांधींनी त्यांच्या अनुभवावर विश्वास ठेवत त्यांना गृहमंत्रिपदाची जबाबदारी सोपवली. मात्र २००८ च्या मुंबई दहशतवादी हल्ल्यानंतर सुरक्षेतील त्रुटीची नैतिक जबाबदारी स्वीकारत त्यांनी मंत्रिपदाचा राजीनामा दिला. नंतर ते पंजाबचे राज्यपाल म्हणूनही अतिशय संयमित व तत्पर कार्यरत राहिले.
सत्य साईबाबांचे निष्ठावंत भक्त, लिंगायत समाजाचे अभिमान स्तंभ, कुटुंबवत्सल व्यक्तिमत्त्व आणि शेकडो कार्यकर्त्यांसाठी प्रेरणास्त्रोत अशी त्यांची ओळख होती.
आज सकाळी ‘देवघर’ निवासस्थानी त्यांनी शांततेत देह ठेवला, आणि एका स्वच्छ प्रतिमेच्या, विद्वान आणि तत्त्वनिष्ठ राजकारण्याचा अंत झाला.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
