पालशेत समुद्रकिनारी अवैध वाळू उपशावर महसूल विभागाची मध्यरात्री धडक कारवाई; वाहन जप्त
गुहागर : गुहागर तालुक्यातील पालशेत समुद्रकिनारी सुरू असलेल्या अवैध वाळू उपशाला आळा घालण्यासाठी महसूल विभागाने बुधवारी मध्यरात्री धडक कारवाई केली. या कारवाईत पालशेत येथील अवधूत मनोहर चव्हाण यांचे वाहन अर्धा ब्रास अवैध वाळूसह ताब्यात घेण्यात आले आहे.
गुहागर व पालशेत परिसरात गेल्या अनेक दिवसांपासून मोठ्या प्रमाणात अवैध वाळू उपसा व वाहतूक सुरू असल्याच्या तक्रारी महसूल विभागाकडे प्राप्त होत होत्या. समुद्रकिनारी रात्रीच्या अंधाराचा फायदा घेऊन वाळू उपसा केला जात असल्याची माहिती मिळाल्यानंतर महसूल विभागाने विशेष पथक तयार करून कारवाईचे नियोजन केले.
बुधवारी रात्री साडेबाराच्या सुमारास पालशेत नाक्यावर तपासणीदरम्यान एक टेम्पो संशयास्पदरीत्या फिरताना आढळला. तातडीने कारवाई करत तलाठी एन. एन. पाटील व मंडळ अधिकारी पी. व्ही. कानिटकर यांनी संयुक्तरित्या वाहन थांबवून तपासणी केली. तपासणीअंती वाहनात अवैधरीत्या उपसलेली अर्धा ब्रास वाळू आढळून आल्याने वाहन जप्त करण्यात आले.
गुरुवारी या प्रकरणी पुढील कायदेशीर कारवाईची प्रक्रिया सुरू होती. वाहनमालक व संबंधितांविरुद्ध गुन्हा नोंदवण्याची शक्यता असून, वाळू उपसा रोखण्यासाठी महसूल विभागाने परिसरात गस्त वाढवली आहे.
महसूल विभागाच्या या तातडीच्या व प्रभावी कारवाईमुळे पालशेत परिसरातील अवैध वाळू उपसा कमी होण्याची शक्यता व्यक्त केली जात आहे. बेकायदेशीर प्रकारांवर नियंत्रण आणण्यासाठी पुढील काळात आणखी कठोर उपाययोजना केल्या जाणार असल्याची माहिती सूत्रांनी दिली आहे.
Author: Mangesh Jadhav
मंगेश जाधव - तळवली रत्नागिरी वार्ताहर - डिजिटल मिडिया प्रतिनिधी.
