वहाळ जिल्हा परिषद गटातून सौ. शिवानी संदीप सावंत यांना महायुतीची उमेदवारी

🚩 वहाळ जिल्हा परिषद गटातून सौ. शिवानी संदीप सावंत यांना महायुतीची उमेदवारी 🚩

पालकमंत्री उदय सामंत यांची अधिकृत घोषणा; महायुतीच्या नेत्यांकडून शुभेच्छांचा वर्षाव

चिपळूण :
वहाळ जिल्हा परिषद गटातून सौ. शिवानी संदीप सावंत यांना शिवसेना–महायुतीकडून अधिकृत उमेदवारी जाहीर करण्यात आली आहे. शिवसेना नेते व रत्नागिरी जिल्ह्याचे पालकमंत्री उदयजी सामंत यांनी ही उमेदवारी जाहीर केली.

यावेळी शिवसेना नेते माजी मंत्री रामदासभाई कदम, उपनेते माजी आमदार सदानंदजी चव्हाण, उपनेते माजी आमदार संजयराव कदम, माजी आमदार सुभाषजी बने, माजी जिल्हा परिषद सदस्य बाळशेठ जाधव यांच्यासह शिवसेना व महायुतीच्या सर्व नेते व पदाधिकाऱ्यांनी सौ. शिवानी सावंत यांना पुढील वाटचालीस शुभेच्छा दिल्या.

चिपळूण तालुक्यातील वहाळ जिल्हा परिषद गट हा राजकीयदृष्ट्या अत्यंत प्रतिष्ठेचा व संवेदनशील गट मानला जातो. या गटातून निवडणूक लढवणे म्हणजे मोठे आव्हान समजले जाते. मात्र, चिपळूण तालुक्यातील लढवय्या नेतृत्व म्हणून ओळख असलेले संदीप सावंत यांनी हे आव्हान स्वीकारत एकनाथ शिंदे यांच्या शिवसेनेकडे उमेदवारीची मागणी केली होती.

या गटात सर्वसाधारण महिला आरक्षण लागू झाल्याने सामाजिक कार्यकर्त्या असलेल्या त्यांच्या पत्नी सौ. शिवानी सावंत यांच्या नावावर पक्षाकडून शिक्कामोर्तब करण्यात आले. उमेदवारी जाहीर होताच स्थानिक पदाधिकारी, ग्रामस्थ व मतदारांकडून त्यांना उत्स्फूर्त प्रतिसाद मिळत आहे.

संदीप सावंत यांनी चिपळूण तालुक्यात विविध आंदोलनांच्या माध्यमातून आपली ठळक ओळख निर्माण केली असून आंदोलन सम्राट म्हणून त्यांची ओळख आहे. सर्वसामान्य व गोरगरीब जनतेच्या न्यायहक्कांसाठी त्यांनी सातत्याने संघर्ष केला आहे.

सौ. शिवानी सावंत या देखील पतीच्या खांद्याला खांदा लावून सामाजिक व राजकीय क्षेत्रात सक्रिय आहेत. कोरोना काळातील त्यांचे कार्य, महिलांसाठी उभारलेले संघटन, बचत गटांच्या माध्यमातून महिलांचे सक्षमीकरण तसेच शांत, संयमी व हसतमुख स्वभावामुळे त्या परिसरात लोकप्रिय महिला नेतृत्व म्हणून ओळखल्या जातात.

या सर्व कार्याची दखल घेत महायुतीकडून त्यांना वहाळ जिल्हा परिषद गटातून उमेदवारी देण्यात आली आहे. यावेळी राज्याचे गृहमंत्री योगेशदादा कदम, भाजप नेते माजी आमदार डॉ. विनयजी नातू, भाजप नेते प्रशांतजी यादव, जिल्हाप्रमुख शशिकांतजी चव्हाण, राहुलजी पंडित, जिल्हाध्यक्ष सतीशजी मोरे यांच्यासह महायुतीच्या सर्व पदाधिकाऱ्यांनी सौ. शिवानी संदीप सावंत यांच्या नावाला जाहीर पाठिंबा दिला.

यामुळे वहाळ जिल्हा परिषद गटाची निवडणूक पुन्हा एकदा राजकीयदृष्ट्या अत्यंत प्रतिष्ठेची व चुरशीची ठरणार असल्याचे स्पष्ट झाले आहे.

Author: RV. Reporters

Guhagar Office .. * Ratnagiri vartahar Digital News * ..