मराठी भाषा मंडळ गुहागरतर्फे मार्गदर्शन व प्रश्नमंजुषा उपक्रम संपन्न 
( मराठी भाषातज्ञ वि.ना.लांडगे यांचे विशेष मार्गदर्शन )
( दुर्वा नाटेकर व हर्षाली काताळकर प्रश्नमंजुषा स्पर्धेत प्रथम )
आबलोली (संदेश कदम)
मराठी भाषा पंधरवडा उपक्रम व मराठी भाषा गौरव दिनानिमित्त गुहागर तालुका मराठी भाषा मंडळ गुहागरतर्फे तालुकास्तरीय प्राथमिक व माध्यमिक गटात प्रश्नमंजुषा स्पर्धा तसेच इयत्ता दहावी मराठी विषयबाबत महाराष्ट्र मराठी माध्यमिक शिक्षक संघाचे माजी राज्याध्यक्ष व मराठी भाषातज्ञ विजयकुमार नारायण लांडगे यांचे विशेष मार्गदर्शन व गुणवंत विद्यार्थी गौरव समारंभ नुकताच पाटपन्हाळे विद्यालयात संपन्न झाला. प्रश्नमंजुषा स्पर्धेतील प्राथमिक गटात दुर्वा दशरथ नाटेकर – गुहागर विद्यालय व माध्यमिक गटात हर्षाली दत्ताराम काताळकर – तात्या वझे पाचेरीआगर विद्यालय या विद्यार्थ्यांनी प्रथम क्रमांक संपादन केला.
गुहागर तालुका मराठी भाषा मंडळ गुहागरतर्फे मराठी भाषा पंधरवडा कार्यक्रम व मराठी भाषा गौरव दिनानिमित्त न्यू इंग्लिश स्कूल व कनिष्ठ महाविद्यालय पाटपन्हाळे विद्यालयात पाटपन्हाळे विद्यालयाच्या मुख्याध्यापिका एस.एस.चव्हाण यांच्या अध्यक्षतेत स्वागत समारंभ नुकताच संपन्न झाला. स्वागत समारंभासाठी महाराष्ट्र मराठी माध्यमिक शिक्षक संघाचे माजी राज्याध्यक्ष व मराठी विषयतज्ञ विजयकुमार लांडगे , गुहागर तालुका मराठी भाषा मंडळाचे माजी अध्यक्ष व वाघांबे हायस्कूलचे माजी मुख्याध्यापक ए.एस.जोशी , मुख्याध्यापिका एस.एस.चव्हाण , गुहागर मराठी भाषा मंडळाचे अध्यक्ष एस.बी.चांदिवडे , गुहागर मुख्याध्यापक संघाचे अध्यक्ष एम.डी.गोरीवले , मराठी भाषा मंडळाचे उपाध्यक्ष पी.बी.जाधव , पालपेणे विद्यालयाचे ज्येष्ठ शिक्षक आर. जी.मोहिते आदी मान्यवर उपस्थित होते. मान्यवरांच्या हस्ते दीपप्रज्वलन , श्रीशारदा माता व कुसुमाग्रज यांच्या प्रतिमांचे पूजन करण्यात आले. मान्यवरांचे व संघटनेच्या उपस्थित पदाधिकारी शिक्षकवृंदांचे पुष्पगुच्छ देऊन स्वागत करण्यात आले.
गुहागर तालुका मराठी भाषा मंडळ गुहागरचे माजी अध्यक्ष व वाघांबे हायस्कूलचे माजी मुख्याध्यापक एस.एस.जोशी यांचा मराठी भाषा मंडळ संघटनेतर्फे शिक्षक सेवा निवृत्तीबद्दल सन्मानचिन्ह , शाल , श्रीफळ व पुष्पगुच्छ कार्यक्रमाध्यक्षांच्या हस्ते व मान्यवरांच्या उपस्थितीत देऊन सन्मान करण्यात आला. इयत्ता दहावी मराठी विषयाचे मार्गदर्शक वि.ना.लांडगे यांचा मराठी भाषा मंडळ गुहागरतर्फे सन्मानचिन्ह , शाल, श्रीफळ व पुष्पगुच्छ कार्यक्रमाध्यक्षा चव्हाण यांच्या हस्ते देऊन सन्मान करण्यात आला. सन्मानित मान्यवरांनी गुहागर तालुका मराठी भाषा मंडळाचे राबवले जाणारे उपक्रम व योगदान याबाबत अभिनंदन करून सन्मान केल्याबद्दल धन्यवाद दिले.
मराठी भाषातज्ञ व मार्गदर्शक वि.ना. लांडगे यांनी उपयोजित लेखनबाबत प्रश्नपत्रिकातील गुणांचा तपशील , विद्यार्थ्यांनी गुण वाढवण्यासाठी करावयाचे प्रयत्न , उत्तर पत्रिका कशा पद्धतीने तपासल्या जातात , मराठीचा पेपर लिहिताना रचना सौंदर्य व भाव सौंदर्याला महत्त्व , लेखन व्यवहार ज्ञान करणे महत्त्वाचे , पत्रलेखन , सारांश लेखन , जाहिरात , बातमी लेखन, कथा व निबंध लेखन , आदर्श उत्तर पत्रिका नमुना , लेखनात नाविन्यता किंवा वेगळेपणा कसा असावा , मराठीचे व्याकरणदृष्ट्या करावयाचे लेखन , उत्तर पत्रिका लिहिताना विद्यार्थ्यांच्या होणाऱ्या चुका व दुर्लक्ष आदी महत्त्वाच्या मुद्द्यांनुसार तंत्रज्ञान सादरीकरणाने व फलक लेखनाने उत्तमरीत्या मार्गदर्शन व विद्यार्थ्यांच्या शंकांचे निरसन केले. सदर इयत्ता दहावी मार्गदर्शनाबाबत विद्यार्थ्यांनी मनोगत व्यक्त केले.
द्वितीय सत्रात गुहागर तालुका मराठी भाषा मंडळ गुहागरतर्फे मराठी भाषेचे संवर्धन व जतन , मराठी भाषेचे महत्व , मराठी भाषा पंधरवडा उपक्रम व मराठी भाषा गौरव दिन आदी उद्देशाने गुहागर तालुकास्तरीय प्राथमिक – इयत्ता पाचवी ते सातवी व माध्यमिक – इयत्ता आठवी ते दहावी गटात मराठी विषयाबाबत प्रश्नमंजुषा स्पर्धा संपन्न झाली. प्राथमिक व माध्यमिक गटात बहुसंख्य विद्यार्थी सदर स्पर्धेसाठी सहभागी झाले होते. प्राथमिक गटात कु. दुर्वा दशरथ नाटेकर – गुहागर विद्यालय – प्रथम क्रमांक , मिहीर समिर पुरोहित – पाटपन्हाळे विद्यालय – द्वितीय क्रमांक , आरुषी सचिन भेकरे – जामसूत विद्यालय – तृतीय क्रमांक , निषाद दिनेश भरणकर – एक्सलंट अकॅडमी आबलोली विद्यालय व लावण्या संतोष पांचाळ – आबलोली विद्यालय – उत्तेजनार्थ क्रमांक संपादन केला. तसेच माध्यमिक गटात हर्षाली दत्ताराम काताळकर – तात्या वझे पाचेरीआगर विद्यालय – प्रथम क्रमांक , स्वरा संतोष लांजेकर – मुंढर विद्यालय – द्वितीय क्रमांक , तनुश्री नोमेश कारेकर – तळवली विद्यालय – तृतीय क्रमांक तसेच विदिशा प्रदीप जाधव – गुहागर हायस्कूल व यश लक्ष्मण हुमणे – माध्यमिक विद्यालय पंचक्रोशी कोळवली – उत्तेजनार्थ क्रमांक संपादन केला. प्रश्नमंजुषा स्पर्धेतील गुणवंत व सहभागी विद्यार्थ्यांच्या गौरव समारंभासाठी कार्यक्रमाध्यक्ष व मराठी भाषा मंडळाचे अध्यक्ष एस.बी.चांदिवडे , गुहागर पं.स. शिक्षण विभागाचे शिक्षण विस्तार अधिकारी एम.एस.वळवी , गुहागर मुख्याध्यापक संघाचे अध्यक्ष एम.डी , गोरीवले , मुख्याध्यापिका एस.एस.चव्हाण , मुख्याध्यापक ए.एच.साठे तसेच संघटनेचे पदाधिकारी शिक्षकवृंद मान्यवर म्हणून उपस्थित होते. मान्यवरांचे पुष्पगुच्छ देऊन स्वागत करण्यात आले. मान्यवर व संघटनेचे पदाधिकारी शिक्षकवृंद यांच्या हस्ते स्पर्धेतील गुणवंत विद्यार्थ्यांना आकर्षक चषक , प्रमाणपत्र , शालेयपयोगी भेटवस्तू व पुष्पगुच्छ तसेच सहभागी विद्यार्थ्यांना सहभाग प्रमाणपत्र व पुष्पगुच्छ मान्यवरांच्या हस्ते देऊन गौरविण्यात आले. शिक्षण विस्तार अधिकारी एम एस वळवी यांनी गुहागर मराठी भाषा मंडळातर्फे राबवले जाणारे दर वर्षाचे विविध उपक्रम , स्पर्धात्मक उपक्रमांमुळे विद्यार्थ्यांना होणारे फायदे आदी मुद्द्यांनुसार आयोजक , मार्गदर्शक , गुणवंत व सहभागी विद्यार्थ्यांचे अभिनंदन केले. कार्यक्रमाध्यक्ष व मराठी भाषा मंडळाचे अध्यक्ष एस.बी.चांदिवडे यांनी उपस्थित मान्यवर , स्पर्धेसाठी सहभागी होणारी विद्यालये व विद्यार्थी , सहभागी व मार्गदर्शक शिक्षकवृंद , तसेच पाटपन्हाळे हायस्कूलचे सहकार्य याबाबत अभिनंदन करून धन्यवाद दिले. मराठी विषयाबाबत प्रश्नमंजुषा स्पर्धा आयोजित केल्यामुळे विद्यार्थ्यांना होणारा फायदा , विद्यार्थ्यांमध्ये स्पर्धा परीक्षांमुळे निर्माण होणारी अभ्यासूवृत्ती आदी मुद्द्यांबाबत मार्गदर्शन केले. कु.तनुश्री नोमेश कारेकर व मिहीर समिर पुरोहित या विद्यार्थ्यांनी प्रश्नमंजुषा स्पर्धा आयोजित केल्यामुळे मराठी विषयाचे झालेले ज्ञान , जोपासलेली वाचन वृत्ती , स्पर्धा परीक्षांमुळे गुणवत्तेसाठी विद्यार्थ्यांमध्ये होणारी चढाओढ याबाबत मनोगत व्यक्त केले. इयत्ता दहावी मराठी विषय मार्गदर्शन वर्गासाठी बहुसंख्य उपस्थित असलेले इयत्ता दहावी व नववीचे विद्यार्थी , प्रश्नमंजुषा स्पर्धेतील गुणवंत व सहभागी विद्यार्थ्यांचे गुहागर तालुका मराठी भाषा मंडळ गुहागरतर्फे अभिनंदन करण्यात आले. मान्यवर स्वागत समारंभ , इयत्ता दहावी – मराठी विषय मार्गदर्शन वर्ग व विद्यार्थी गुणवंत गौरव समारंभाचे सूत्रसंचालन मराठी भाषा मंडळ गुहागरचे सचिव व पाटपन्हाळे विद्यालयाचे मराठी विषय शिक्षक एस.एम.आंबेकर यांनी केले. सदरच्या शैक्षणिक उपक्रमासाठी मराठी विषयतज्ञ वि.ना.लांडगे , सन्मानित मान्यवर ए.एस.जोशी , शिक्षण विस्तार अधिकारी एम.एस.वळवी , मुख्याध्यापक व शिक्षकवृंद , गुणवंत व सहभागी विद्यार्थी व विद्यालये आदींच्या सहकार्याबद्दल उपाध्यक्ष पी.बी.जाधव यांनी आभार मानून कार्यक्रमाचा समारोप केला.
Author: RV. Reporters
Guhagar Office .. * Ratnagiri vartahar Digital News * ..
