मारक्रमचा महास्फोट; दक्षिण आफ्रिका उपांत्य फेरीत, वेस्ट इंडिजचा ९ गडी राखून दणदणीत पराभव
मुंबई (गुरुदत्त वाकदेकर) : आयसीसी पुरुष टी–२० विश्वचषक २०२६ मधील सुपर–८ गट १ च्या अत्यंत महत्त्वाच्या सामन्यात दक्षिण आफ्रिकेने वेस्ट इंडिजचा ९ गडी राखून जबरदस्त पराभव करत उपांत्य फेरीकडे निर्णायक पाऊल टाकले. नरेंद्र मोदी स्टेडियमवर झालेल्या या लढतीत कर्णधार एडन मारक्रमने साकारलेले नाबाद ८२ धावांचे धडाकेबाज शतकासमान अर्धशतक आणि संपूर्ण संघाची शिस्तबद्ध कामगिरी हा विजयाचा मुख्य आधार ठरला. नाणेफेक जिंकून प्रथम गोलंदाजी स्वीकारलेल्या दक्षिण आफ्रिकेच्या माऱ्यासमोर वेस्ट इंडिजचा डाव सुरुवातीलाच कोलमडला. अवघ्या ४४ धावांत चार प्रमुख फलंदाज बाद झाल्याने कॅरिबियन संघ संकटात सापडला. लुंगी एनगिडीने टप्याटप्याने मारा करत ४ षटकांत ३० धावांत ३ बळी घेत फलंदाजीची घडी विस्कटली. कगिसो रबाडाने २ बळी घेत दबाव कायम ठेवला. एकाकी झुंज देताना रोमारियो शेफर्डने ३७ चेंडूत नाबाद ५२ धावांची स्फोटक खेळी साकारली, तर जेसन होल्डरने ३१ चेंडूत ४९ धावा करत संघाचा डाव २० षटकांत ८ बाद १७६ धावांपर्यंत नेला. या दोघांमधील ८९ धावांची भागीदारी ही टी–२० विश्वचषक इतिहासातील ८व्या विकेटसाठीची सर्वाधिक भागीदारी ठरली.
१७७ धावांच्या लक्ष्याचा पाठलाग करताना दक्षिण आफ्रिकेने सुरुवातीपासूनच आक्रमक भूमिका घेत सामना एकतर्फी केला. क्विंटन डी कॉक आणि एडन मारक्रम यांनी पहिल्या विकेटसाठी अवघ्या ८ षटकांत ९५ धावांची धडाकेबाज भागीदारी रचली. डी कॉक २४ चेंडूत ४७ धावा करून बाद झाला. मात्र, त्यानंतर रायन रिकेल्टनने २८ चेंडूत नाबाद ४५ धावा करत मारक्रमला अचूक साथ दिली.
कर्णधार एडन मारक्रमने ४६ चेंडूत ७ चौकार आणि ४ षटकारांसह नाबाद ८२ धावांची अफलातून खेळी साकारत सामना पूर्णपणे आपल्या नियंत्रणात ठेवला. दक्षिण आफ्रिकेने अवघ्या १६.१ षटकांत १ बाद १७७ धावा करत २३ चेंडू शिल्लक ठेवून विजय साकारला.
या सामन्यात अनेक ऐतिहासिक विक्रमांची नोंद झाली.
मारक्रम कर्णधार म्हणून टी–२० विश्वचषकात सलग पाच सामने जिंकणारा पहिला दक्षिण आफ्रिकन खेळाडू ठरला. तसेच टी–२० विश्वचषक सुपर–८ टप्प्यातील ९ गडी राखून मिळवलेला हा दक्षिण आफ्रिकेचा सर्वांत मोठा विजय ठरला. वेस्ट इंडिजविरुद्ध १७७ धावांचे लक्ष्य केवळ १६.१ षटकांत गाठण्याचा पराक्रम करत दक्षिण आफ्रिकेने या स्पर्धेतील सर्वांत जलद यशस्वी धावसंख्या पाठलागाचा नवा विक्रम प्रस्थापित केला. याशिवाय, शेफर्ड–होल्डर यांची ८९ धावांची भागीदारी ही टी–२० विश्वचषक इतिहासातील आठव्या विकेटसाठीची सर्वात मोठी भागीदारी ठरली.
या विजयासह दक्षिण आफ्रिका सुपर–८ गट १ मधील अव्वल स्थानावर पोहोचला असून उपांत्य फेरीतील प्रवेश जवळपास निश्चित केला आहे. दमदार फलंदाजी, शिस्तबद्ध गोलंदाजी आणि टोकदार क्षेत्ररक्षण यांच्या जोरावर दक्षिण आफ्रिकेने या स्पर्धेत विजेतेपदासाठीचा आपला दावा अधिक मजबूत केला आहे.
एकूणच, मारक्रमच्या नेतृत्वाखाली खेळलेला हा सामना दक्षिण आफ्रिकेच्या सामर्थ्याचे प्रखर दर्शन घडवणारा ठरला असून टी–२० विश्वचषकाच्या इतिहासात हा विजय सुवर्णाक्षरांनी नोंदवला जाणार आहे.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
