फरहानचे ऐतिहासिक शतक, पाकिस्तानचा थरारक विजय; तरीही विश्वचषकातून गच्छंती
मुंबई (गुरुदत्त वाकदेकर) : आयसीसी पुरुष टी-२० विश्वचषक २०२६ मधील सुपर–८ फेरीतील अत्यंत उत्कंठावर्धक सामन्यात पाकिस्तानने श्रीलंकेवर अवघ्या ५ धावांनी नाट्यमय विजय मिळवला. मात्र, गुणतालिकेतील समीकरणांमुळे हा विजय अपुरा ठरला आणि पाकिस्तानचे उपांत्य फेरीचे स्वप्न याच सामन्यात संपुष्टात आले. साहिबजादा फरहानच्या ऐतिहासिक शतकाने आणि अखेरच्या षटकातील जबरदस्त थराराने हा सामना अविस्मरणीय ठरला.
नाणेफेक गमावून प्रथम फलंदाजी करत पाकिस्तानने २० षटकांत ८ बाद २१२ धावांचा डोंगर उभारला. सलामीवीर साहिबजादा फरहानने ६० चेंडूंत ९ चौकार आणि ५ षटकारांसह झंझावाती १०० धावा करत डावाची भक्कम पायाभरणी केली. त्याला फखर झमानने ४२ चेंडूंत ९ चौकार आणि ४ षटकारांसह ८४ धावांची आक्रमक साथ दिली. या जोडीने पहिल्या विकेटसाठी १७६ धावांची विक्रमी भागीदारी रचत श्रीलंकेच्या गोलंदाजीवर पूर्ण वर्चस्व गाजवले. मात्र, शेवटच्या षटकांत नियमित अंतराने पडलेल्या विकेट्समुळे पाकिस्तानला २१२/८ एवढ्यावर समाधान मानावे लागले.
प्रत्युत्तरात श्रीलंकेने शेवटपर्यंत झुंज देत सामना रंगतदार केला. कर्णधार दासुन शनाकाने ३१ चेंडूंत ८ षटकारांसह नाबाद ७६ धावांची वादळी खेळी करत पाकिस्तानच्या छावणीत खळबळ उडवून दिली. त्याला पवन रत्नायकेने ३७ चेंडूंत ४ चौकार आणि ३ षटकारांसह ५८ धावांची प्रभावी साथ दिली. दोघांमधील ६१ धावांची भागीदारी निर्णायक ठरत होती. मात्र, लेगस्पिनर अब्रार अहमदने अचूक आणि शिस्तबद्ध गोलंदाजी करत ४ षटकांत २३ धावांत ३ बळी घेत सामन्याची दिशा बदलली. अखेर श्रीलंका २० षटकांत ६ बाद २०७ धावांपर्यंत मजल मारू शकला आणि पाकिस्तानने अवघ्या ५ धावांनी थरारक विजय साकारला.
या सामन्यात अनेक ऐतिहासिक विक्रमांची नोंद झाली. साहिबजादा फरहान टी-२० विश्वचषकाच्या एका स्पर्धेत दोन शतके करणारा पहिला फलंदाज ठरला. याआधी कोणालाही हा पराक्रम साधता आला नव्हता. फरहान–फखर झमान यांची १७६ धावांची सलामी भागीदारी ही टी-२० विश्वचषकाच्या इतिहासातील पाकिस्तानची सर्वात मोठी सलामी भागीदारी ठरली. याआधीचा १६३ धावांचा विक्रम या जोडीने मोडीत काढला. तसेच, २१२ विरुद्ध २०७ हा अवघ्या ५ धावांचा फरक हा टी-२० विश्वचषक इतिहासातील उच्च धावसंख्येतील सर्वांत थरारक सामन्यांपैकी एक ठरला.
विजयानंतरही गुणतालिकेतील गुंतागुंतीच्या समीकरणांमुळे पाकिस्तानला उपांत्य फेरीचे तिकीट मिळाले नाही. त्यामुळे फरहानचे ऐतिहासिक शतक, संघाची अखेरपर्यंतची झुंज आणि शेवटच्या क्षणांतील उत्कंठावर्धक खेळ असूनही पाकिस्तानचा विश्वचषक प्रवास येथेच थांबला. श्रीलंकेच्या पराभवामुळे न्यूझीलंडने उपांत्य फेरीत प्रवेश निश्चित केला असून आशियाई संघांमध्ये आता केवळ भारताचेच आव्हान शिल्लक राहिले आहे. विक्रम, संघर्ष, थरार आणि नाट्य यांचा अद्भुत संगम असलेला हा सामना क्रिकेटप्रेमींच्या स्मरणात दीर्घकाळ कोरला जाणार आहे.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
