गॅस एजन्सीचा मनमानी कारभार; पडवेवासीय मेटाकुटीला!
बुकिंग होऊनही सिलिंडर मिळेना, पण ‘ओटीपी’ आला! ५२ सिलिंडरचा परस्पर काळाबाजार होत असल्याचा ग्राहकांचा संशय
पडवे (गुहागर):
सध्या इराण आणि अमेरिका यांच्यातील वाढत्या तणावामुळे आंतरराष्ट्रीय बाजारपेठेत कच्च्या तेलाच्या आणि गॅसच्या किमती गगनाला भिडल्या आहेत. या युद्धजन्य परिस्थितीमुळे भारतातही महागाईचा भडका उडाला असून सर्वसामान्य नागरिकांना दैनंदिन जगण्यासाठी मोठी कसरत करावी लागत आहे. अशा कठीण काळात गुहागर तालुक्यातील पडवे येथे गॅस वितरणात सुरू असलेल्या सावळ्यागोंधळाने ग्राहकांचे जगणे अधिकच कठीण केले आहे.
बुकिंग एकाचे, सिलिंडर दुसऱ्याला?
पडवे परिसरात गुहागरमधील एका एच.पी. गॅस एजन्सीद्वारे सिलिंडर पुरवठा केला जातो. गेल्या काही दिवसांपासून ७ ते ८ ग्राहकांनी रीतसर आगाऊ (Advance) बुकिंग केले होते. मात्र, प्रत्यक्षात त्यांना सिलिंडर मिळालेच नाही. धक्कादायक बाब म्हणजे, या ग्राहकांच्या मोबाइलवर ‘सिलिंडर डिलिव्हर’ झाल्याचा ओटीपी (OTP) प्राप्त झाला. याचाच अर्थ, कागदोपत्री डिलिव्हरी दाखवून प्रत्यक्ष सिलिंडर दुसऱ्यालाच विकले गेल्याचे स्पष्ट होत आहे.
कमिशनसाठी कर्मचाऱ्यांचे संगनमत?
जेव्हा या प्रकाराबाबत संबंधित ग्राहकांनी गॅस एजन्सीच्या कस्टमर केअरकडे विचारणा केली, तेव्हा त्यांना सहकार्य करण्याऐवजी उडवाउडवीची उत्तरे देऊन फोन कापून टाकण्यात आला. डिलिव्हरी करणारे वाहक आणि कर्मचारी जादा कमिशनपोटी हक्काचे सिलिंडर चढ्या भावाने परस्पर विकत असावेत, असा दाट संशय ग्राहकांनी व्यक्त केला आहे.
५२ सिलिंडरचे गौडबंगाल आणि सीएससी केंद्रांचा सवाल.
मिळालेल्या खात्रीशीर माहितीनुसार, पडवे येथे एका मध्यस्थ व्यक्तीला कोणत्याही परवान्याशिवाय तब्बल ५२ सिलिंडर पुरवण्यात आले आहेत. नियमानुसार, अधिकृत सीएससी (CSC) केंद्रधारकांना केवळ ६ सिलिंडर वितरणाची परवानगी दिली जाते. मग एका सामान्य मध्यस्थाला इतक्या मोठ्या प्रमाणात साठा कोणत्या निकषावर दिला गेला? हा प्रश्न आता उपस्थित केला जात असून यामागे मोठे रॅकेट असण्याची शक्यता वर्तवली जात आहे.
> “इराण-अमेरिका युद्धामुळे आधीच इंधन दरवाढ झाली असताना, स्थानिक स्तरावर असा काळाबाजार होणे दुर्दैवी आहे. आम्ही रीतसर तक्रार देऊनही एजन्सी दखल घेत नाही, हे संतापजनक आहे.”
— त्रस्त ग्राहक, पडवे
जिल्हा पुरवठा विभागाकडे लेखी तक्रार दाखल करणार.
गॅस एजन्सीकडून कोणतीही दाद मिळत नसल्याने अखेर पडवे येथील संतापलेल्या ग्राहकांनी जिल्हा पुरवठा विभाग, रत्नागिरी यांच्याकडे लेखी तक्रार दाखल केली आहे. या गैरप्रकाराची सखोल चौकशी व्हावी आणि सर्वसामान्यांची लूट थांबवावी, अशी मागणी नागरिकांनी केली आहे. आता प्रशासन यावर काय कारवाई करते, याकडे संपूर्ण तालुक्याचे लक्ष लागले आहे.
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
