संगमेश्वरमध्ये भीषण अपघात : लोवले येथे निष्काळजीपणामुळे ट्रक दरीत कोसळला, दोघे जखमी
देवरुख–संगमेश्वर राज्यमार्गावरील धोकादायक वळणावर समोरासमोर धडक; चालकाला केबिनमधून बाहेर काढण्यासाठी थरारक बचावकार्य
संगमेश्वर (प्रतिनिधी):
देवरुख–संगमेश्वर राज्यमार्गावरील लोवले येथे सोमवारी रात्री झालेल्या भीषण अपघाताने परिसरात खळबळ उडाली आहे. वळणावर वाहन चालवताना झालेल्या निष्काळजीपणामुळे हा गंभीर अपघात घडल्याचे प्राथमिक तपासात समोर आले आहे.
मिळालेल्या माहितीनुसार, सोमवारी रात्री सुमारे १०.३० ते ११ वाजण्याच्या दरम्यान एमएच ४६ बीएफ ६२१० क्रमांकाचे एलपी वाहन देवरुखहून संगमेश्वरकडे येत होते. त्याचवेळी चिपळूणहून बॉक्साईट भरून आंबाघाटाच्या दिशेने जाणारा एमएच १० सीआर ३४५६ क्रमांकाचा ट्रक समोरून येत होता. लोवले येथील धोकादायक वळणावर एलपी वाहन चालकाने वाहतुकीचे नियम न पाळता वाहन रस्त्याच्या मधोमध आणल्याने समोरून येणाऱ्या ट्रकला बाजू देणे शक्य झाले नाही आणि दोन्ही वाहनांची जोरदार धडक झाली.
या धडकेची तीव्रता इतकी होती की ट्रक चालकाचे नियंत्रण सुटून बॉक्साईटने भरलेला ट्रक रस्त्याखालील सुमारे पाच ते सहा फूट खोल दरीत कोसळला. अपघाताचा आवाज ऐकून परिसरातील नागरिकांनी घटनास्थळी धाव घेतली.
अपघातात एलपी वाहनाच्या केबिनचा अक्षरशः चक्काचूर झाला होता. चालक बालाजी जलबा कोंडेवार (रा. नांदेड) हा केबिनमध्ये अडकून पडला होता. घटनेची माहिती मिळताच संगमेश्वर पोलिसांनी तातडीने घटनास्थळी धाव घेत स्थानिकांच्या मदतीने धाडसी बचावकार्य करून चालकाला बाहेर काढले.
या अपघातात एलपी चालक बालाजी कोंडेवार आणि ट्रक चालक मोहम्मद युसूफ शफी शेख हे दोघेही जखमी झाले असून त्यांच्यावर संगमेश्वर ग्रामीण रुग्णालयात उपचार सुरू आहेत.
दरम्यान, अपघातामुळे काही काळ या मार्गावरील वाहतूक ठप्प झाली होती. पोलिसांनी घटनास्थळी पंचनामा करून अपघातग्रस्त वाहने हटवून वाहतूक सुरळीत केली. प्राथमिक तपासानुसार एलपी वाहन चालकाच्या निष्काळजीपणामुळे अपघात झाल्याचे स्पष्ट होत असून पुढील तपास सुरू आहे.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
