पालू गावाचे भूषण काका गुरव यांना पोलीस उपनिरीक्षक पदावर बढती
पालू (गुरुदत्त वाकदेकर): पालू गावाचे मान्यवर व अत्यंत प्रतिष्ठित व्यक्तिमत्त्व काका गुरव यांना पोलीस विभागात पोलीस उपनिरीक्षक (पीएसआय) या जबाबदारीच्या पदावर बढती मिळाल्याने गावात आनंदाचे वातावरण निर्माण झाले आहे. सुमारे दोन महिन्यांपूर्वी अर्हता पदोन्नती प्राप्त झाल्याने त्यांच्या या यशाचा गावकऱ्यांकडून उत्साहाने गौरव केला जात आहे.
काका गुरव यांनी सन २०१३ मध्ये पोलीस उपनिरीक्षक पदाची परीक्षा उत्तीर्ण केली होती. त्यानंतर ‘मॅट कोर्ट’ प्रकरण प्रलंबित असल्यामुळे पदोन्नती प्रक्रियेत विलंब झाला होता. सातत्यपूर्ण प्रयत्न आणि संयमाच्या जोरावर त्यांनी सर्व अडथळ्यांवर मात करत अखेर हे मानाचे पद प्राप्त केले आहे. सध्या ते मंत्रालयात कार्यरत असून आपल्या कर्तव्यदक्षतेमुळे त्यांनी वेगळी ओळख निर्माण केली आहे.
अथक परिश्रम, प्रामाणिकपणा आणि जिद्दीच्या बळावर मिळवलेले हे यश केवळ वैयक्तिक मर्यादेत न राहता संपूर्ण पालू गावासाठी अभिमानाची आणि प्रेरणादायी घटना ठरली आहे. त्यांच्या यशामुळे गावातील तरुणांमध्ये नवी उमेद आणि स्पर्धात्मकतेची भावना निर्माण होत असल्याचे चित्र आहे.
काका गुरव यांनी भविष्यातही आपल्या कर्तृत्वाने उंच भरारी घ्यावी, समाजसेवा अधिक जोमाने करावी आणि पालू गावाचे नाव उज्ज्वल करावे, अशी अपेक्षा व्यक्त होत आहे. त्यांच्या पुढील वाटचालीसाठी उत्तम आरोग्य, सातत्यपूर्ण यश आणि अधिकाधिक प्रगतीच्या मनःपूर्वक शुभेच्छा व्यक्त करण्यात येत आहेत.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
