सिंधुदुर्गात देशातील पहिले ‘अंडरवॉटर टुरिझम’ केंद्र; आयएनएस गुलदार वेंगुर्ले समुद्रात बुडवणार
ऐतिहासिक युद्धनौकेच्या माध्यमातून पर्यटनाला चालना; स्कुबा डायव्हिंगसह सागरी पर्यटनाला नवे दालन
सिंधुदुर्ग – वार्ताहर
INS Guldar या भारतीय नौदलाच्या ऐतिहासिक युद्धनौकेमुळे सिंधुदुर्ग जिल्ह्याच्या पर्यटन क्षेत्राला नवा आयाम मिळणार आहे. विजयदुर्ग बंदरात तब्बल १४ महिन्यांच्या मुक्कामानंतर रविवारी सायंकाळी ही युद्धनौका वेंगुर्लेकडे रवाना करण्यात आली. वेंगुर्ले येथील दीपगृह परिसरातील समुद्रात ही युद्धनौका नियोजनपूर्वक बुडवून देशातील पहिल्या महत्त्वाकांक्षी ‘पाण्याखालील पर्यटन’ प्रकल्पाची सुरुवात करण्यात येणार आहे.
३० डिसेंबर १९८५ रोजी भारतीय नौदलाच्या सेवेत दाखल झालेली आयएनएस गुलदार ही ८१ मीटर लांबीची आणि सुमारे १२०० टन विस्थापन क्षमता असलेली युद्धनौका होती. अत्याधुनिक ३० मिमी क्लोज रेंज गन आणि रॉकेट लॉन्चर्सने सज्ज असलेल्या या जहाजाने देशरक्षणासोबतच अनेक नैसर्गिक आपत्तींच्या काळात मदतकार्य करून महत्त्वाची भूमिका बजावली होती. अडकलेल्या नागरिकांची सुटका, आपत्कालीन साहित्य वितरण आणि बचाव मोहिमांमध्ये या नौकेने उल्लेखनीय कामगिरी बजावली आहे.
वेंगुर्ले समुद्रात ही युद्धनौका बुडवल्यानंतर त्या ठिकाणी कृत्रिम खडकांची निर्मिती होणार असून त्यामुळे सागरी जैवविविधतेलाही चालना मिळणार आहे. यासोबतच देश-विदेशातील पर्यटकांसाठी स्कुबा डायव्हिंग, अंडरवॉटर फोटोग्राफी आणि सागरी साहसी पर्यटनाचे आकर्षण निर्माण होणार आहे.
ऐतिहासिक युद्धनौकेला समुद्राच्या तळाशी प्रत्यक्ष पाहण्याचा रोमांचक अनुभव पर्यटकांना घेता येणार असल्याने सिंधुदुर्ग जिल्ह्याच्या पर्यटन अर्थव्यवस्थेला मोठी गती मिळण्याची शक्यता व्यक्त होत आहे. वेंगुर्ले परिसर भविष्यात देशातील महत्त्वाचे ‘अंडरवॉटर टुरिझम’ केंद्र म्हणून ओळखले जाऊ शकते.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
