राज ठाकरे यांच्या मुख्यमंत्री देवेंद्र फडणवीसांना शुभेच्छा – पुढील ५ वर्ष पाठिंबा देण्याची घोषणा

राज ठाकरे यांच्या मुख्यमंत्री देवेंद्र फडणवीसांना शुभेच्छा – पुढील ५ वर्ष पाठिंबा देण्याची घोषणा..
मुंबई – महाराष्ट्राचे मुख्यमंत्री म्हणून देवेंद्र फडणवीस यांनी शपथ घेतली. आझाद मैदानावर झालेल्या शपथविधी सोहळ्यात एकनाथ शिंदे आणि अजित पवार यांनी उपमुख्यमंत्री म्हणून शपथ घेतली. या शपथविधी सोहळ्यासाठी पंतप्रधान नरेंद्र मोदी, गृहमंत्री अमित शहा यांच्यासह अनेक केंद्रीय मंत्री तसेच विविध राज्याचे मुख्यमंत्री उपस्थित होते. शपथविधीनंतर फडणवीसांसह दोन्ही उपमुख्यमंत्री मंत्रालयात पोहोचले.
राज्यात नव्या सरकारचा शपथविधी झाला आणि त्यानंतर काही मिनिटातच मनसेचे अध्यक्ष राज ठाकरे यांनी मुख्यमंत्री देवेंद्र फडणवीस यांना शुभेच्छा दिल्या. राज ठाकरे यांनी एक्सवर एक पोस्ट लिहून फडणवीसांना शुभेच्छा दिल्या. या शुभेच्छांमध्ये राज यांनी फडणवीसांना खर तर २०१९ साली संधी मिळायला हवी होती. पण तेव्हा आणि २०२२ मध्ये जे काही घडले त्यामुळे त्यांची संधी हुकल्याचा उल्लेख केला.
पुढे राज म्हणतात की, विधानसभा निवडणुकीत फडणवीसांच्या नेतृत्वाला जे अविश्वसनीय बहुम दिले आहे त्याचा वापर ते राज्यासाठी, मराठी माणसांसाठी, मराठी भाषेसाठी तसेच संस्कृतीसाठी वापर करती अशी आशा त्यांनी व्यक्त केली. पुढील पाच वर्षासाठी राज्य सरकारच्या चांगल्या उपक्रमांना माझा आणि मनसेचा पाठिंबा असल्याचे राज यांनी म्हटले आहे.
मनसे अध्यक्ष राज ठाकरे यांची पोस्ट जशी आहे तशी...
आज माझे स्नेही आणि भारतीय जनता पक्षाचे महाराष्ट्रातील नेते श्री. देवेंद्र फडणवीस यांनी तिसऱ्यांदा मुख्यमंत्रीपदाची शपथ घेतली, याबद्दल त्यांचं अभिनंदन.
२०१९ ला खरंतर ही संधी त्यांना मिळायला हवी होती, पण तेंव्हा आणि पुढे २०२२ मध्ये जे घडलं त्यामुळे ती संधी हुकली. असो, पण यावेळेस महाराष्ट्रातील जनतेने महायुतीला म्हणण्यापेक्षा देवेंद्र फडणवीस यांच्या नेतृत्वाला जे प्रचंड अविश्वसनीय बहुमत दिलं आहे, त्याचा या राज्यासाठी, इथल्या मराठी माणसांसाठी आणि मराठी भाषा आणि संस्कृतीसाठी तुम्ही योग्य वापर कराल अशी मी आशा करतो.
पुढची ५ वर्ष सरकारच्या कुठल्याही चांगल्या उपक्रमांना माझा, माझ्या पक्षाचा पाठींबा असेल.
पण सरकार चुकतंय, लोकांना गृहीत धरतंय असं जर जाणवलं, तर मात्र विधिमंडळात जरी सध्या शक्य नसलं तरी, विधिमंडळाच्या बाहेर मात्र आम्ही सरकारला त्यांच्या चुकांची जाणीव करून देऊ हे नक्की…

मुख्यमंत्री श्री. देवेंद्र फडणवीस, आणि उपमुख्यमंत्री श्री. एकनाथ शिंदे आणि श्री अजित पवार आणि तसंच भविष्यातील त्यांच्या मंत्रिमंडळातील सर्व सहकाऱ्यांना महाराष्ट्र नवनिर्माण सेनेच्या शुभेच्छा !

Author: Sujit Surve.

⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕