भराडी देवीने कौल दिला, आंगणेवाडीच्या जत्रेची तारीख २२ फेब्रुवारी २०२५, चाकरमान्यांची लगबग सुरु
सिंधूदुर्ग – समस्त कोकणवासियांच्या नजरा लागलेली आंगणेवाडीच्या जत्रेची तारीख ठरली आहे. २२ फेब्रुवारी २०२५ रोजी आंगणेवाडी येथे देवीचा वार्षिक उत्सव होणार आहे. तळकोकणातील भराडी देवीला कौल लावून झाल्यानंतर यात्रेची तारीख निश्चित केली जाते. गेल्या अनेक वर्षापासून चालू असलेली ही प्रथा यावेळीही पार पाडण्यात आली आहे. देवीने कौल दिल्यानंतर आंगणेवाडी ग्रामस्थ मंडळाने यात्रेची तारीख आज सकाळी जाहीर केली आहे.
*नवसाला पावणारी देवी*
या भराडी देवीचे महत्त्व असे की, नवसाला पावणारी आणि हाकेला धावणारी अशी या देवीची ख्याती आहे. लाखो भक्तांचे श्रद्धास्थान म्हणून ओळखल्या जाणाऱ्या देवीची प्रसिद्धी आहे. तळ कोकणामध्ये थंडीचा हंगाम सुरू झाल्यानंतर भराडी देवीकडे सर्व भक्तांचे लक्ष लागलेले असते. या भराडी देवीच्या उत्सवाला महाराष्ट्रातून नव्हे तर महाराष्ट्राच्या बाहेरुन सुद्धा मोठ्या प्रमाणावर भक्तजन येत असतात. त्याचप्रमाणे या भराडी देवीकडे राजकीय नेत्यांची सुद्धा मोठ्या प्रमाणावर मांदियाळी पाहायला मिळते.
*चाकरमान्यांची तिकिटासाठी लगबग*
सिंधुदुर्गातील सुपुत्र असलेले राजकारणी नेते मंडळी या यात्रेला आवर्जून भेट देत असतात आणि आपले गाऱ्हाणे या देवीकडे मांडत असतात. त्याचप्रमाणे गावातील मुंबईस्थित चाकरमानी तर यात्रेच्या तारखेकडे डोळे लावून असतात. डिसेंबर महिना आला की मुंबईस्थित चाकरमानी, मित्रमंडळी आपआपल्या नातेवाईकांना सतत संपर्क ठेवून असतात. तारीख निश्चित झाली की यात्रेत येण्यासाठी तिकीट बुकिंगसाठी गर्दी, सुट्टीसाठी धडपड करत असतात.
भराडी देवी हे आंगणे कुटुंबीयांचे खाजगी देवस्थान असून या देवीच्या उत्सवाला आणि यात्रेला आंगणे कुटुंबीय दरवर्षी मोठ्या प्रमाणावर येत असतात. या यात्रोत्सवामध्ये धार्मिक विधी आंगणे कुटुंबीयांकडून मोठ्या प्रमाणावर केले जातात. या यात्रा उत्सवची तारीख आज सकाळी मंडळाच्या वतीने २२ फेब्रुवारी २०२५ रोजी होणार असल्याचे जाहीर करण्यात आले.
दरवर्षी या यात्रा उत्सवाला दहा ते बारा लाख भाविक येत असतात. या यात्रा उत्सवाला मोठ्या प्रमाणावरती भाविक येत असल्यामुळे पोलीस प्रशासन देखील सतर्क असलेलं पाहायला मिळतं. कोणताही अनुचित प्रकार घडू नये यासाठी पोलीस दरवर्षी विशेष काळजी घेत असतात.
Author: Team Ratnagiri Vartahar
Official Ratnagiri vartahar Media creators & RV News YouTube Channel.
