जम्मू-काश्मीरमध्ये लष्कराच्या वाहनाला भीषण अपघात; ३०० फूट खोल दरीत वाहन कोसळले; ५ जवानांचा मृत्यू
श्रीनगर– जम्मू-काश्मीरच्या पुंछ जिल्ह्यात आज मंगळवारी सायंकाळी मोठी दुर्घटना घडली. मेंढर क्षेत्रातील बलनोई परिसरात लष्कराचे एक वाहन सुमारे ३०० फूट दरीत कोसळून भीषण अपघात घडला. या भीषण अपघातात ५ जवानांचा मृत्यू झाला आहे. दुर्घटनेत अनेक जवान जखमी झाले आहेत. अपघाताची माहिती मिळताच लष्करी अधिकारी घटनास्थळी पोहोचले. त्यांनी बचावकार्य सुरु केलं आहे. जखमी जवानांना रुग्णालयात दाखल करण्यात आलं आहे. त्यांच्यावर उपचार सुरु आहेत. त्यांची प्रकृतीबद्दलची माहिती लष्कराकडून अद्याप देण्यात आलेली नाही.
लष्कराच्या वाहनात ८-९ जवान होते. त्यातील ५ जणांचा दुर्दैवी अंत झाला आहे. अन्य जवानांवर उपचार सुरु आहेत. नीलम मुख्यालयाहून बलनोई घोरा पोस्टकडे जात असलेलं सैनिकांचं वाहन घोरा पोस्टवर पोहोचताच अपघातग्रस्त झालं. जवानांची गाडी थेट ३०० ते ३५० फूट दरीत पडली. अपघाताची माहिती मिळताच ११ एमएलआयची क्यूआरटी लगेचच पोहोचली. त्यांनी बचावकार्य सुरु केलं. भारतीय लष्कराच्या व्हाईट नाईट कोरनं आपल्या अधिकृत ट्विटर अकाऊंटवर एक ट्विट केलं आहे. ‘पुंछ सेक्टरमध्ये ऑपरेशन ड्युटी दरम्यान एका वाहन दुर्घटनेदरम्यान पाच शूर जवानांचा मृत्यू झाला. त्याबद्दल व्हाईट नाईट कॉर्प्सचे सगळ्या रँकचे जवान सहवेदना व्यक्त करतात. बचावकार्य सुरु आहे. जखमी जवानांवर उपचार सुरु आहेत,’ असं व्हाईट नाईट कोरनं ट्विटमध्ये म्हटलं आहे.
गेल्या महिन्यात असाच एक अपघात जम्मू-काश्मीरच्या राजौरी जिल्ह्यात झाला होता. त्यात एका सैनिकाचा मृत्यू झाला, तर एक जवान जखमी झाला होता. ४ नोव्हेंबरला कालाकोटच्या बडोग गावाजवळ हा अपघात झाला. नायक बद्रीलाल आणि शिपाई जय प्रकाश गंभीर जखमी झाले. त्यांना तातडीनं जवळच्या रुग्णालयात दाखल करण्यात आलं. लाल यांची प्राणज्योत उपचारादरम्यान मालवली. २ नोव्हेंबरला जम्मू काश्मीरच्या रियासी जिल्ह्यात एक कार डोंगरावरुन रस्त्यावरुन खोल दरीत कोसळली होती. या अपघातात एक महिला आणि तिच्या १० महिन्यांच्या मुलासह तीन जणांचा मृत्यू झाला. तर तीन जण गंभीर जखमी झाले.
Author: Team Ratnagiri Vartahar
Official Ratnagiri vartahar Media creators & RV News YouTube Channel.
