तळवली प्रो कबड्डी पर्व 5 चा विजेता पारमी पलटण तर उपविजेता सुफयान वॉरियर्स
नवी मुंबई (मंगेश जाधव)
तालुक्यातील तळवली येथे आयोजित प्रो कबड्डी स्पर्धा पर्व 5 चे विजेतेपद पारमी पलटण – संघ मालक पारमी ॲप तर उपविजेतेपद सुफयान वॉरियर्स – संघ मालक इम्रान शेठ घारे यांनी पटकाविले.
मा. संजय शेठ पडवळ पुरस्कृत सेव्हन स्टार कबड्डी संघ तळवली आयोजित पंचक्रोशी मर्यादित, प्रो कबड्डी स्पर्धा पर्व 5 चे आयोजन दिनांक 4 जानेवारी 2025 रोजी करण्यात आले होते. या स्पर्धेमध्ये संघमालक इम्रानशेठ घारे यांचा सुफयान वॉरियर्स, सागर हातीस्कर यांचा एचडी फायटर्स, साईप्रसाद गावडे व सुदेश वेद्रे यांचा देवांश वॉरियर्स, हेमंत चव्हाण व दिलीप आग्रे यांचा शिवनेरी पलटण, दीपेश व शुभम शिगवण यांचा सुकाई फायटर्स तर पारमी ॲप (प्रतिनिधी सम्यक गमरे) यांचा पारमी पलटण असे 6 संघ सहभागी झाले होते.
तळवली प्रो कबड्डी पर्व 5 चा विजेता पारमी पलटण तर उपविजेता सुफयान वॉरियर्स
तळवली पंचक्रोशी मध्ये अतिशय नावाजलेली ही प्रो कबड्डी स्पर्धा आंतरराष्ट्रीय खेळाडू, ब्लॅक बेल्ट प्रमोद रामचंद्र पवार यांच्या अध्यक्षतेखाली पार पडली. या स्पर्धेसाठी मुख्य अतिथी म्हणून आंतरराष्ट्रीय खेळाडू प्रमोद पवार, फुटबॉल चे नॅशनल खेळाडू शैलेश गमरे, कबड्डीचे राष्ट्रीय पंच व ज्युनिअर कॉलेज पाटपन्हाळे चे प्राध्यापक संजीव मोरे, माजी सैनिक सुनिल जाधव, उपस्थित होते. तर मान्यवर म्हणून तळवलीच्या सरपंच सौ. मयुरी शिगवण, पोलीस पाटील विनोद पवार, तंटामुक्त समितीचे अध्यक्ष राकेश पवार, निगुंडळ गावचे पोलीस पाटील प्रकाश आंबोकर, श्री सुकाई देवी ग्रामदेवता मंडळ तळवली चे अध्यक्ष गणपत शिगवण, सचिव प्रदीप चव्हाण, प्राध्यापक अमोल जड्याळ, तळवलीचे शिक्षक प्रवीण केळस्कर, संजय कुळे, प्रभाकर कांबळे, श्रीनाथ कुळे, चिपळूण येथून प्राथमिक शिक्षक सुमित उफाड, नवनाथ घाटुळ, दिनेश रोडे, सेवार्थ फाऊंडेशन पुणे चे संचालक संदीप चव्हाण, तळवलीचे ॲड. संतोष आग्रे, सुभेदार प्रशांत शिगवण, पत्रकार आशिष कारेकर उपस्थित होते.
सुरुवातीला उपस्थित मुख्य अतिथी यांचेमार्फत डॉ.बाबासाहेब आंबेडकर, छत्रपती शिवाजी महाराज यांच्या प्रतिमेला पुष्पहार अर्पण करण्यात आला. त्यानंतर शैलेश गमरे, प्रा.संजीव मोरे, प्रमोद पवार यांनी फित कापून स्पर्धेचे उद्घाटन केले तर श्रीफळ वाढवून सरपंच मयुरी शिगवण यांनी मैदानाचे उद्घाटन केले.
अतिशय चुरशीच्या झालेल्या या सामान्यांनी क्रीडारसिकांची मने जिंकली. अखेरच्या झालेल्या चुरशीच्या सामन्यात पारमी पलटण ने 2 गुणांनी विजय मिळवून विजेतेपद पटकावले. विजेत्या संघाला रोख रुपये 8000/-, चषक व प्रत्येक खेळाडूला मेडल, उपविजेत्या संघाला रोख रुपये 7000/-, चषक व प्रत्येक खेळाडूला मेडल तर उत्कृष्ट खेळाडू – प्रणय मुकनाक ( पारमी पलटण) याला रोख रुपये 1000/-, मेडल व चषक, उत्कृष्ट चढाई – साहिल घारे (सुफयान वॉरियर्स) याला रोख रुपये 500/-, मेडल व चषक, उत्कृष्ट पकड – स्वयम आंबोकर ( पारमी पलटण) याला रोख रुपये 500/-, मेडल व चषक देवून गौरविण्यात आले. तर सहभागी संघमालक यांना सन्मानचिन्ह चषक देवून सन्मानित करण्यात आले. या स्पर्धेचे समालोचन प्रशांत गावडे, प्रदीप चव्हाण यांनी केले तर सूत्रसंचालन शिक्षक संजय कुळे, प्रभाकर कांबळे व प्रा.अमोल जड्याळ यांनी केले. या स्पर्धेचे आयोजन व संपूर्ण व्यवस्थापन सेव्हन स्टार कबड्डी संघ तळवलीच्या वतीने करण्यात आले. यासाठी विशेष मेहनत सेव्हन स्टार चे व्यवस्थापक पत्रकार उत्तम पवार, खेळाडू केतन शिगवण, समीर गीजे, अभिषेक सांगळे, अतुल आग्रे, नितीन बेंडल, नयन शिगवण, सुरज गीजे, साहिल भातडे यांनी घेतली. संपूर्ण स्पर्धा रत्नागिरीतील पहिले रजिस्टर यु-ट्यूब चॅनल स्वामी इव्हेंटस् गुहागर च्या माध्यमातून लाईव्ह दाखविण्यात आल्याने महाराष्ट्रभरातून अनेक क्रीडा रसिकांना हा कबड्डीचा थरार पाहता आला.
Author: Mangesh Jadhav
मंगेश जाधव - तळवली रत्नागिरी वार्ताहर - डिजिटल मिडिया प्रतिनिधी.
