राज्यात दरवर्षी महसूल क्रीडा स्पर्धांचे आयोजन – महसूलमंत्री चंद्रशेखर बावनकुळे यांची घोषणा
कोकण विभागाला सर्वसाधारण विजेतेपद, छत्रपती संभाजीनगर दुसऱ्या तर पुणे विभाग तिसऱ्या क्रमांकावर
नांदेड, ता. २५: राज्यस्तरीय महसूल क्रीडा स्पर्धांमध्ये कोकण विभागाने सर्वसाधारण विजेतेपद पटकावले असून, यजमान छत्रपती संभाजीनगरने द्वितीय आणि पुणे विभागाने तृतीय क्रमांक मिळवला. तीन दिवस चाललेल्या या स्पर्धांचा समारोप रविवारी (ता. २५) मोठ्या उत्साहात पार पडला. महसूलमंत्री चंद्रशेखर बावनकुळे व पालकमंत्री अतुल सावे यांच्या हस्ते विजेत्यांना बक्षिसे प्रदान करण्यात आली.
महसूलमंत्री बावनकुळे यांनी यापुढे ही क्रीडा स्पर्धा दरवर्षी आयोजित केली जाणार असून, त्यासाठी राज्य शासन एक कोटी रुपयांची तरतूद करणार असल्याची घोषणा केली. तसेच, महसूल विभागातील क्रीडापटूंना नियुक्ती व पदोन्नतीमध्ये प्राधान्य देण्यात येईल, असेही त्यांनी सांगितले.
तीन दिवसांचा क्रीडा महोत्सव
या स्पर्धेत नागपूर, अमरावती, छत्रपती संभाजीनगर, पुणे, नाशिक, कोकण तसेच नोंदणी मुद्रांक व भूमि अभिलेख या सात विभागांतील २,००० हून अधिक अधिकारी-कर्मचाऱ्यांनी सहभाग घेतला. क्रिकेट, कबड्डी, खो-खो, व्हॉलीबॉल, फुटबॉल, जलतरण, बुद्धिबळ, टेबल टेनिस, बॅडमिंटन यांसह ८३ प्रकारांमध्ये स्पर्धा घेण्यात आल्या.
सांस्कृतिक स्पर्धांमध्ये नाशिक विभागाने प्रथम क्रमांक पटकावला, तर कोकण विभाग दुसऱ्या आणि नागपूर विभाग तिसऱ्या स्थानावर राहिला. तसेच, संचलन स्पर्धेत छत्रपती संभाजीनगर विभागाने बाजी मारली.
नागरिकांसाठी WhatsApp Grievance App लोकार्पण
महसूलमंत्री बावनकुळे यांच्या हस्ते नांदेड जिल्हाधिकारी कार्यालयाच्या WhatsApp Grievance App चे लोकार्पण करण्यात आले. या सुविधेमार्फत नागरिक ९२७०१०१९४७ या क्रमांकावर आपल्या तक्रारी व मागण्या पाठवू शकतात.
समारोप सोहळ्यास खासदार डॉ. अजित गोपछडे, आमदार बाबुराव कदम कोहळीकर, आ. तुषार राठोड, आ. राजेश पवार, विभागीय आयुक्त दिलीप गावडे, विशेष पोलीस महानिरीक्षक शाहाजी उमाप, तसेच जिल्हाधिकारी, पोलिस अधिकारी आणि महसूल विभागातील वरिष्ठ अधिकारी उपस्थित होते.
महसूल विभागातील कर्मचाऱ्यांसाठी या क्रीडा स्पर्धा मोठ्या उत्साहवर्धक ठरल्या असून, पुढील वर्षीच्या आयोजनाकडे सर्वांचे लक्ष लागले आहे.
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
