कोकणातील रायवळ आंबा संवर्धनासाठी मोठी मोहीम; प्रत्येक जिल्हा परिषद गटात ५ हजार झाडे लावण्याची मागणी
“एक बाठ, एक आशा” संकल्पनेतून पर्यावरण संवर्धन आणि हापूस उत्पादन वाढीसाठी अॅड. महेंद्र मांडवकर यांचे जिल्हा परिषद प्रशासनाला निवेदन
रत्नागिरी : कोकणातील पारंपरिक रायवळ आंबा संवर्धनासाठी आणि पर्यावरण संरक्षणासाठी प्रत्येक जिल्हा परिषद गटामध्ये किमान ५ हजार रायवळ आंब्यांची झाडे लावण्याची व्यापक मोहीम राबवावी, अशी मागणी रत्नागिरी जिल्हा परिषद सदस्य अॅड. महेंद्र रुक्मिणी वसंत मांडवकर यांनी जिल्हा परिषद प्रशासनाकडे निवेदनाद्वारे केली आहे.
“एक बाठ, एक आशा” या संकल्पनेतून ही मोहीम राबविण्याचा प्रस्ताव त्यांनी मांडला आहे. जिल्हा परिषद अध्यक्ष तसेच मुख्य कार्यकारी अधिकारी यांना दिलेल्या निवेदनात त्यांनी कोकणातील रायवळ आंब्यांचे झपाट्याने कमी होत असलेले प्रमाण आणि त्याचा हापूस आंबा उत्पादनावर होत असलेला परिणाम याबाबत गंभीर चिंता व्यक्त केली आहे.
मांडवकर यांनी निवेदनात नमूद केले आहे की, हापूस आंब्याच्या प्रभावी परागीकरणासाठी रायवळ आंबा अत्यंत महत्त्वाचा मानला जातो. मात्र गेल्या काही वर्षांत रायवळ आंब्यांची संख्या मोठ्या प्रमाणात घटल्याने हापूस उत्पादनातही घट होत आहे. तसेच रोगराई आणि कीड वाढण्याच्या समस्या निर्माण होत असल्याचे त्यांनी स्पष्ट केले.
पूर्वी कोकणातील गावागावांत रायवळ आंब्यांची मोठ्या प्रमाणावर झाडे आढळत होती. मात्र कालांतराने त्यांची संख्या कमी होत गेली असून अनेक गावांमध्ये रायवळ आंबा दुर्मिळ झाला आहे. त्यामुळे स्थानिक जैवविविधतेलाही धोका निर्माण होत असल्याचे निवेदनात नमूद करण्यात आले आहे.
प्रस्तावित मोहिमेनुसार प्रत्येक जिल्हा परिषद गटात किमान ५ हजार रायवळ आंब्यांची झाडे लावावीत. पंचायत समिती स्तरावर रोपवाटिका उभारून “एक शेतकरी, पाच झाडे” या उपक्रमांतर्गत मोफत रोपांचे वाटप करावे, अशी मागणी करण्यात आली आहे. तसेच शाळा, अंगणवाडी, स्मशानभूमी, सार्वजनिक ठिकाणे आणि रस्त्यांच्या कडेला मोठ्या प्रमाणावर रायवळ आंब्यांची लागवड करण्याचे आवाहनही करण्यात आले आहे.
या मोहिमेमुळे हापूस उत्पादन वाढण्यास मदत होईल, पर्यावरण संवर्धनाला चालना मिळेल आणि भविष्यातील पिढ्यांसाठी स्थानिक जैवविविधता टिकून राहील, असा विश्वास व्यक्त करण्यात आला आहे. तसेच शेतकऱ्यांना आर्थिकदृष्ट्या फायदा होण्यास मदत होईल, असेही निवेदनात म्हटले आहे.
“५००० झाडे म्हणजे ५००० ऑक्सिजन सिलिंडर” असे म्हणत पर्यावरण संरक्षणासाठी ही मोहीम अत्यंत महत्त्वाची असल्याचे अॅड. महेंद्र मांडवकर यांनी नमूद केले आहे.
रायवळ आंबा संवर्धनासाठी जिल्हा परिषद, पंचायत समिती, कृषी विभाग आणि सामाजिक वनीकरण विभाग यांनी संयुक्तपणे पुढाकार घ्यावा, अशी मागणीही त्यांनी केली आहे.
SEO Keywords :
रायवळ आंबा, हापूस आंबा, रत्नागिरी बातमी, कोकण आंबा संवर्धन, महेंद्र मांडवकर, पर्यावरण संवर्धन, रायवळ आंबा लागवड, Ratnagiri News, Konkan Mango News, Alphonso Mango Pollination, Mango Plantation Campaign
Author: RV. Reporters
Guhagar Office .. * Ratnagiri vartahar Digital News * ..
