गुहागरच्या श्री देव गोपाळकृष्ण विद्यालयात संस्कृत दिन उत्साहात साजरा

August 29, 2026
9:21 am
Post Views: 105

गुहागरच्या श्री देव गोपाळकृष्ण विद्यालयात संस्कृत दिन उत्साहात साजरा

विद्यार्थ्यांच्या विविध संस्कृत सादरीकरणांनी रंगला कार्यक्रम; संस्कृत भाषेचे ऐतिहासिक, सांस्कृतिक व शैक्षणिक महत्त्व अधोरेखित

गुहागर (प्रतिनिधी) : गुरुवार, दिनांक २७ ऑगस्ट २०२६ रोजी नारळी पौर्णिमेच्या निमित्ताने श्री देव गोपाळकृष्ण माध्यमिक विद्यामंदिर व कनिष्ठ महाविद्यालय, गुहागर येथे संस्कृत दिन उत्साहपूर्ण आणि संस्कृतमय वातावरणात साजरा करण्यात आला.

कार्यक्रमाची सुरुवात सरस्वती पूजन व सरस्वती वंदनेने झाली. त्यानंतर संस्कृत शिक्षिका सौ. सुचिता ठाकूर यांनी प्रास्ताविकातून कार्यक्रमाची रूपरेषा उपस्थितांसमोर मांडली.

यावेळी विद्यालयाच्या मुख्याध्यापिका सौ. सुजाता कांबळे, उपमुख्याध्यापिका श्रीमती मनीषा सावंत आणि वरिष्ठ शिक्षक श्री. गंगावणे सर उपस्थित होते. विद्यार्थ्यांनी संस्कृत भाषेचे महत्त्व, संस्कृत साहित्य तसेच भारतीय संस्कृतीची ओळख करून देणारी विविध मनोगते व सादरीकरणे केली.

कुमारी स्वरा पाटील हिने ‘संस्कृत भाषेचे महत्त्व’ या विषयावर मनोगत व्यक्त केले. कुमारी पूर्वी शिंदे हिने संस्कृत कथा सादर केली, तर सिमरन मालप हिने संस्कृत श्लोकांचे सुंदर सादरीकरण केले. वरद भागवत याने पाणिनी यांची माहिती देत संस्कृत व्याकरणाच्या क्षेत्रातील त्यांच्या योगदानावर प्रकाश टाकला. विभा मालप हिने महाकवी कालिदास यांची माहिती दिली. मनाली घाडीगावकर हिने संस्कृत भाषेचे महत्त्व विशद केले. तसेच कुमारी गार्गी क्षीरसागर हिने ‘आजच्या काळातील संस्कृत भाषेचे महत्त्व’ या विषयावर प्रभावी मनोगत व्यक्त केले.

कार्यक्रमात श्री कालभैरवाष्टक स्तोत्र, एकश्लोकी रामायण आणि एकश्लोकी भागवत यांचेही सुंदर सादरीकरण करण्यात आले. कैवल्य विध्वंस, गंधार देपोलकर आणि ईशान्य काळे यांनी या सादरीकरणात सहभाग घेतला.

यावेळी विद्यालयातील वरिष्ठ शिक्षक श्री. गंगावणे, उपमुख्याध्यापिका श्रीमती सावंत आणि मुख्याध्यापिका सौ. कांबळे यांनी मार्गदर्शनपर मनोगते व्यक्त केली. त्यांनी संस्कृत भाषेचे ऐतिहासिक, सांस्कृतिक व शैक्षणिक महत्त्व अधोरेखित करत विद्यार्थ्यांनी संस्कृत भाषेचा अभ्यास आणि वापर वाढवावा, असे आवाहन केले.

कार्यक्रमाचे सूत्रसंचालन संस्कृत शिक्षिका सौ. ज्योती देवकर यांनी केले. कार्यक्रमाच्या शेवटी कुमारी स्वरा पाटील हिने आभार प्रदर्शन केले.

विद्यार्थ्यांच्या उत्स्फूर्त सहभागामुळे संपूर्ण कार्यक्रमाला संस्कृतमय वातावरण लाभले. संस्कृत भाषेचा गौरव आणि विद्यार्थ्यांमध्ये संस्कृतविषयीची आवड निर्माण करणारा हा कार्यक्रम उत्साहात संपन्न झाला.