२०१६ नंतर पहिल्यांदाच बेंगळुरू शीर्ष-२ मध्ये; क्वालिफायर-१ मध्ये होणार पंजाबशी सामना

२०१६ नंतर पहिल्यांदाच बेंगळुरू शीर्ष-२ मध्ये; क्वालिफायर-१ मध्ये होणार पंजाबशी सामना

मुंबई (गुरुदत्त वाकदेकर) : विराट कोहलीच्या अर्धशतकाच्या आणि जितेश शर्मा आणि मयंक अग्रवाल यांच्यातील शतकी भागीदारीच्या जोरावर, रॉयल चॅलेंजर्स बंगळुरूने (आरसीबी) लखनौ सुपर जायंट्स (एलएसजी) ला सहा विकेट्सने पराभूत केले. या विजयासह, आरसीबीने क्वालिफायर-१ मध्ये प्रवेश केला. आता, त्यांचा सामना २९ मे रोजी मुल्लानपूर येथे पंजाब किंग्जशी होईल. मंगळवारी लखनौच्या एकाना स्टेडियमवर खेळल्या गेलेल्या लीग टप्प्यातील शेवटच्या सामन्यात लखनौने ऋषभ पंतच्या शतकाच्या जोरावर तीन विकेट गमावून २२७ धावा केल्या. प्रत्युत्तरात, आरसीबीने १८.४ षटकांत चार गडी गमावून २३० धावा केल्या आणि सामना जिंकला. आयपीएलमधील हा तिसरा सर्वात यशस्वी धावांचा पाठलाग आहे. त्याच वेळी, हे आरसीबीचे सर्वात मोठे धावांचे आव्हान आहे. लखनौकडून विल्यम ओ’रोर्कने दोन तर आकाश सिंग आणि आवेश खानने प्रत्येकी एक विकेट घेतली.
आरसीबीचा घराबाहेरचा हा सातवा विजय आहे. यासह संघाने इतिहास रचला आहे. अशी कामगिरी करणारा आरसीबी हा पहिला आयपीएल संघ ठरला. हंगामाच्या सुरुवातीला, आरसीबीने गतविजेत्या कोलकाताला त्यांच्या घरच्या मैदानावर पराभूत केले. यानंतर, चेन्नई सुपर किंग्जचा चेन्नईमध्ये, मुंबई इंडियन्सचा मुंबईत, राजस्थान रॉयल्सचा जयपूरमध्ये, पंजाब किंग्जचा न्यू चंदीगडमध्ये आणि दिल्ली कॅपिटल्सचा दिल्लीमध्ये पराभव झाला.
आयपीएल २०२५ मधील लीग टप्प्यातील हा शेवटचा सामना होता, जो आरसीबीने जिंकला. २०१६ नंतर प्रथमच, संघाने साखळीत शीर्ष-२ मध्ये स्थान मिळवले. आयपीएलच्या इतिहासात आतापर्यंत आरसीबीने तीनदा शीर्ष-२ मध्ये स्थान मिळवले आहे. या हंगामापूर्वी, संघ २०१६ आणि २०११ मध्ये शीर्ष-२ मध्ये होता. लखनौवरील विजयासह, आरसीबी १९ गुणांसह आणि ०.३०१ च्या नेट रन रेटसह पॉइंट टेबलमध्ये दुसऱ्या स्थानावर पोहोचला. दरम्यान, लखनौने १४ सामन्यांत सहा विजय आणि आठ पराभवांसह १२ गुणांसह सातवे स्थान पटकावले. आता क्वालिफायर-१ मध्ये आरसीबीचा सामना पंजाब किंग्जशी होईल. सोमवारी श्रेयस अय्यरच्या संघाने मुंबईवर शानदार विजय मिळवला होता. मुंबई आणि गुजरात यांच्यातील या हंगामातील एलिमिनेटर सामना ३० मे रोजी खेळला जाईल.
लक्ष्याचा पाठलाग करताना, आरसीबीला फिल साॅल्ट आणि विराट कोहलीने चांगली सुरुवात करून दिली. दोघांमध्ये पहिल्या विकेटसाठी ६१ धावांची भागीदारी झाली. आकाश सिंगने ही भागीदारी मोडली. त्याने सॉल्टला दिग्वेशकडून झेलबाद केले. तो १९ चेंडूत ३० धावा करून बाद झाला. यानंतर फलंदाजीला आलेला रजत पाटीदार केवळ १४ धावा करू शकला. आठव्या षटकाच्या पाचव्या चेंडूवर विल्यम ओ’रोर्कने त्याला बाद केले. पुढच्याच चेंडूवर त्याने लिव्हिंगस्टोनलाही तंबूचा रस्ता दाखवला.
९० धावांवर तीन विकेट गमावल्यानंतर आरसीबीला मोठ्या भागीदारीची आवश्यकता होती. विराट कोहली एका टोकाला उभा होता, त्याला मयंक अग्रवालने साथ दिली. दोघांनीही चौथ्या विकेटसाठी ३३ धावांची भागीदारी केली. यादरम्यान, कोहलीने २७ चेंडूत हंगामातील आठवे अर्धशतक पूर्ण केले. त्याने ३० चेंडूत १० चौकारांच्या मदतीने ५४ धावा केल्या. त्याची शिकार अावेश खानने केली होती. यानंतर मयंकला जितेश शर्माची साथ मिळाली. या दोघांनी ४५ चेंडूत १०७ धावांची नाबाद भागीदारी करून आरसीबीचा विजय निश्चित केला. यादरम्यान, स्थायी कर्णधार जितेशने त्याच्या आयपीएल कारकिर्दीतील पहिले अर्धशतकही पूर्ण केले. तो ३३ चेंडूत ८५ धावा करून नाबाद राहिला आणि मयंक २३ चेंडूत ४१ धावा करून नाबाद राहिला.
त्याआधी, लखनौची सुरुवात निराशाजनक झाली. त्यांनी २५ धावांवर पहिली विकेट गमावली. मॅथ्यू ब्रीट्झकेला नुवान तुषाराने त्रिफळाचीत केले. तो १४ धावा करून बाद झाला. तथापि, तिसऱ्या क्रमांकावर आलेल्या कर्णधार ऋषभ पंतने जबाबदारी सांभाळली. त्याने मिशेल मार्शसोबत दुसऱ्या विकेटसाठी १५२ धावांची मोठी भागीदारी केली. यादरम्यान मार्शने ३७ चेंडूत चार चौकार आणि पाच षटकारांच्या मदतीने ६७ धावा केल्या. त्याच वेळी, ऋषभ पंत फॉर्ममध्ये परतला आणि त्याने ५४ चेंडूत त्याच्या आयपीएल कारकिर्दीतील दुसरे शतक पूर्ण केले. त्याने ६१ चेंडूत ११ चौकार आणि आठ षटकारांसह ११८ धावा काढल्या आणि नाबाद राहिला. बेंगळुरूविरुद्ध, पूरन १३ धावांवर आणि अब्दुल समद एका धावेवर नाबाद राहिले. दरम्यान, आरसीबीकडून नुवान तुषारा, भुवनेश्वर कुमार आणि रोमारियो शेफर्ड यांनी प्रत्येकी एक विकेट घेतली.

Author: Sujit Surve.

⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕