प्रसिद्ध गायिका-अभिनेत्री सुलक्षणा पंडित यांचे निधन; चित्रपटसृष्टीत शोककळा
नवीमुंबई (मंगेश जाधव)
आपल्या मधुर आवाजाने आणि भावपूर्ण अभिनयाने प्रेक्षकांच्या मनावर अमीट छाप सोडणाऱ्या प्रसिद्ध गायिका व अभिनेत्री सुलक्षणा पंडित यांचे निधन झाले आहे. वयाच्या ७१व्या वर्षी त्यांनी मुंबईतील नानावटी रुग्णालयात अखेरचा श्वास घेतला. गेल्या काही वर्षांपासून त्या आजारी होत्या आणि तब्बल १६ वर्षांपासून अंथरुणाला खिळल्या होत्या. त्यांच्या निधनामुळे बॉलिवूड आणि संगीत क्षेत्रात हळहळ व्यक्त केली जात आहे.
सुलक्षणा पंडित यांनी ७० आणि ८० च्या दशकात आपल्या मोहक आवाजाने आणि नैसर्गिक अभिनयाने प्रेक्षकांना मंत्रमुग्ध केलं. त्यांचा जन्म १९५४ मध्ये एका प्रतिष्ठित संगीतघराण्यात झाला. त्या दिग्गज शास्त्रीय गायक पंडित जसराज यांच्या भाची असून, प्रसिद्ध संगीतकार जोडी जतिन-ललित यांच्या बहिणी होत्या.
फक्त नऊव्या वर्षी त्यांनी गायन कारकिर्दीची सुरुवात केली. १९६७ मध्ये त्यांनी पार्श्वगायनाला सुरुवात केली आणि ‘संकल्प’ चित्रपटातील “तू ही सागर है तू ही किनारा” या गाण्यासाठी त्यांना फिल्मफेअर पुरस्कार मिळाला.
गायनाबरोबरच सुलक्षणा पंडित यांनी अभिनय क्षेत्रातही आपली छाप सोडली. उलझन, संकोच आणि इतर चित्रपटांमध्ये त्यांनी अभिनेता संजीव कुमार यांच्यासोबत काम केले. त्यांच्या भावनाप्रधान अभिनयाने आणि सुरेल आवाजाने त्या काळातील प्रेक्षकांना भुरळ घातली होती.
तथापि, त्यांच्या वैयक्तिक आयुष्यात मात्र वेदनादायी प्रसंग आले. त्यांनी लग्न केलं नाही आणि संजीव कुमार यांच्याशी असलेलं नातं अधुरं राहिलं. या प्रेमकथेच्या अपूर्णतेचा त्यांच्या आयुष्यावर खोल परिणाम झाला. पुढे आजारपण आणि आर्थिक अडचणींमुळे त्यांचं जीवन कठीण बनलं.
सुलक्षणा पंडित यांच्या निधनाने भारतीय चित्रपट आणि संगीतसृष्टीने एक सुरेल आणि संवेदनशील व्यक्तिमत्त्व गमावलं आहे. त्यांच्या योगदानाची आठवण प्रेक्षकांच्या मनात सदैव जिवंत राहील.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
