धक्कादायक! आयकर विभागाच्या चौकशीदरम्यान बेंगळुरूतील नामांकित बिल्डरची आत्महत्या

👇बातम्या ऐकण्यासाठी येथे क्लिक करा

धक्कादायक! आयकर विभागाच्या चौकशीदरम्यान बेंगळुरूतील नामांकित बिल्डरची आत्महत्या

इन्कम टॅक्स अधिकाऱ्यांची झडती सुरू असतानाच खासगी कक्षात जाऊन स्वतःवर झाडली गोळी; उद्योगजगतात खळबळ

बेंगळुरू :
बेंगळुरूतील नामांकित रिअल इस्टेट व्यावसायिक सी. जे. रॉय यांनी शुक्रवारी दुपारी आत्महत्या केल्याची धक्कादायक घटना घडली आहे. विशेष म्हणजे ही घटना त्यांच्या कार्यालयात सुरू असलेल्या आयकर विभागाच्या चौकशीदरम्यान घडल्याने शहरासह संपूर्ण उद्योगजगतात खळबळ उडाली आहे.

मिळालेल्या माहितीनुसार, शुक्रवारी सकाळपासूनच आयकर विभागाचे पथक रॉय यांच्या कार्यालयासह संबंधित ठिकाणी झडती घेत होते. दुपारच्या सुमारास सी. जे. रॉय कार्यालयात आले आणि त्यानंतर त्यांची अधिकाऱ्यांकडून चौकशी सुरू करण्यात आली. चौकशीदरम्यान काही आर्थिक कागदपत्रांची मागणी करण्यात आली होती.

त्यावर रॉय यांनी ती कागदपत्रे आपल्या खासगी कक्षातून आणण्याची परवानगी मागितली. काही मिनिटांतच त्यांच्या कक्षातून गोळीबाराचा जोरदार आवाज आला. आवाज ऐकताच अधिकारी आत धावले असता रॉय रक्ताच्या थारोळ्यात पडलेले आढळून आले. त्यांनी स्वतःच्या वैयक्तिक पिस्तुलातून छातीत गोळी झाडून घेतल्याचे प्राथमिक तपासात समोर आले आहे.

घटनास्थळी उपस्थित अधिकाऱ्यांनी त्यांना तातडीने बेंगळुरूतील नारायणा हॉस्पिटलमध्ये दाखल केले. मात्र डॉक्टरांनी तपासणीनंतर त्यांना मृत घोषित केले.

या घटनेनंतर पोलिसांनी संपूर्ण परिसर ताब्यात घेत आत्महत्येच्या प्रकरणाचा तपास सुरू केला आहे. आत्महत्येमागील नेमकी कारणे, आयकर चौकशीदरम्यान नेमके काय घडले आणि मानसिक दबावाचा या घटनेशी संबंध आहे का, याचा शोध घेतला जात आहे.