तवसाळ गाव पंचक्रोशीचा नेत्रदीपक शिमगोत्सव सोहळा जल्लोषात साजरा

👇बातम्या ऐकण्यासाठी येथे क्लिक करा

तवसाळ गाव पंचक्रोशीचा नेत्रदीपक शिमगोत्सव सोहळा जल्लोषात साजरा

गुहागर, तवसाळ – तवसाळ गाव पंचक्रोशीतील तांबडवाडी-बाबरवाडी, तवसाळ खुर्द, तवसाळ पडवे, तवसाळ मोहीतेवाडी, तवसाळ आगर (रोहीले), तांबडवाडी बौद्धवाडी, तवसाळ बौद्धवाडी २ वाड्या अशा संपूर्ण भागात पारंपरिक उत्साहात शिमगोत्सव सोहळा साजरा करण्यात आला. गावच्या परंपरेला अनुसरून १२ शिमगेचे होम करण्यात आले. त्यापैकी ९ होम विविध ठिकाणी पार पडले, तर ३ होम आई श्री महामाई सोनसाखळी देवीच्या चरणस्पर्शाने साजरे करण्यात आले.

शिमगोत्सवाची सुरुवात : १३ मार्च २०२५

दि. १३ मार्च २०२५ रोजी रात्री उशिरा गावातील देवतांना रूपे लावून पालखीत विराजमान करण्यात आले. आई श्री महामाई सोनसाखळी मंदिर परिसरात रात्री १२ वाजता होम पेटविण्यात आला आणि त्यानंतर १० वा होम प्रारंभ झाला.

या वेळी प्रमुख मानकरी:

श्री राजेश रमेश गडदे (महामाई सोनसाखळी देवीचे मानकरी)

तवसाळ गावचे खोत व गावकरी

पंचक्रोशीतील ग्रामस्थ व मानकरी

कर्दै गावच्या गुरव कुटुंबाने वडिलोपार्जित सेवेतून पूजाअर्चा केली.

शिमगोत्सवाची भव्य सुरुवात : १४ मार्च २०२५

१४ मार्चच्या सकाळी ९ वाजता भाविक दर्शनासाठी मंदिर परिसरात दाखल झाले. पालखी मंदिराच्या सहानेवर विराजमान होती आणि परिसरात जत्रेचे स्वरूप आले होते. तवसाळ खुर्द येथे देवीच्या पालखीचा हळदी-कुंकू कार्यक्रम झाला. यानंतर संपूर्ण गावात देवीच्या दर्शनासाठी घरोघरी मिरवणूक काढण्यात आली.

समुद्रपूजन आणि अख्यायिका जिवंत ठेवणारा सोहळा

तवसाळ खुर्द पंचक्रोशीत मोठी जत्रा भरली आणि त्यानंतर देवीला जयगड खाडी येथे फेरी बोटीने नेऊन नारळ अर्पण करण्यात आला. लोकश्रुतीनुसार, देवी आपल्या बहिणीला भेटण्यासाठी समुद्रमार्गे जात असल्याची परंपरा आजही जिवंत ठेवली जाते. परत आल्यावर ११ व्या होमाची विधीवत सांगता झाली.

शिमगोत्सवाचा पारंपरिक सोहळा

महामाई सोनसाखळी साऊंड सर्विस आणि गणेश सागवेकर यांच्यातर्फे भव्य मंडप उभारण्यात आला. यावेळी विविध लोककला सादर करण्यात आल्या. तमाशा नृत्य हा प्रमुख आकर्षणाचा केंद्रबिंदू होता.

तमाशा नृत्य वैशिष्ट्ये:

भंडारी साज, पेहराव आणि मृदंगाचा ताल

घुंगरांच्या आवाजात रंगलेला नृत्याचा कार्यक्रम

गर्दीने फुललेला उत्सव

यानंतर रोहीले बीच (तवसाळ आगर) येथे पालखी नाचविण्याचा कार्य क्रम पार पडला. अनेक भाविकांनी होमामध्ये नारळ अर्पण केले आणि १२ व्या होमाने शिमगोत्सवाची सांगता झाली.

अक्षय तृतीया पर्यंत पालखी दर्शन

शिमगोत्सवानंतर पालखी तवसाळ खुर्द सहानेवर ठेवण्यात आली. ती ३० एप्रिल २०२५ (अक्षय तृतीया) पर्यंत दर्शनासाठी उपलब्ध असेल. त्यानंतर देवीच्या गावातील प्रत्येक घरात दर्शन यात्रेचा प्रारंभ होईल.

शिमगोत्सवाच्या यशस्वी आयोजनासाठी विशेष अभिनंदन

या नेत्रदीपक सोहळ्याच्या यशस्वी आयोजनासाठी प्रणय सुर्वे, हर्षद सुर्वे, तसेच सोशल मीडिया व DJ सचिन कुळये यांनी विशेष योगदान दिले. यामुळे हा सोहळा राज्यभरात प्रसिद्ध झाला आहे.

संस्कृती आणि एकात्मतेचा जागर

हा शिमगोत्सव जातिभेदाच्या पलीकडे जाऊन सर्व समाजाला एकत्र आणणारा सोहळा आहे. तवसाळ पंचक्रोशीत संस्कृतीचे जतन, परंपरांचा सन्मान आणि समाजाची एकजूट यांचा सुंदर मिलाफ या उत्सवाच्या माध्यमातून अनुभवता आला.

– रिपोर्टिंग टीम, गुहागर