दिव्यांगांची गगनभरारी : विमानातून घेतला आनंद, गिरनारपर्यंत प्रवास
रत्नागिरी जिल्ह्यातील ९ अतितीव्र दिव्यांग बांधवांचा दुर्गाशक्ती सामाजिक चळवळ व अशोक भुस्कुटे परिवारातर्फे विमान प्रवास सहल; राजकोट, गिरनार व सोमनाथचे दर्शन
“आयुष्यात एकदातरी विमानातून प्रवास करायचा” हे स्वप्न अनेकांचे असते, पण अतितीव्र दिव्यांग बांधवांसाठी हे स्वप्न दूरचेच वाटते. हे स्वप्न प्रत्यक्षात उतरवण्यासाठी दुर्गाशक्ती सामाजिक चळवळ व दिव्यांगमैत्र अशोक विठ्ठल भुस्कुटे यांनी पुढाकार घेत, ‘दिव्यांगांची गगनभरारी’ या उपक्रमांतर्गत विशेष विमान प्रवास सहल आयोजित केली.
रत्नागिरी जिल्ह्यातील चिपळूण, दापोली, पाजपंढरी, भंडारपुळे अशा विविध भागांतील ९ दिव्यांग बांधवांनी या सहलीत सहभाग घेतला. तीव्र दिव्यांगत्वामुळे घराबाहेरही न पडणाऱ्यांसाठी हा प्रवास म्हणजे जीवनातील ऐतिहासिक क्षण ठरला. मुंबईहून राजकोटपर्यंतचा विमानप्रवास आणि त्यानंतर गिरनार पर्वतावर रोपवे सफर, सोरटी सोमनाथ ज्योतिर्लिंगाचे दर्शन, गिर नॅशनल पार्कमध्ये जंगल सफारी असा तीन दिवसांचा रोमांचकारी प्रवास दिव्यांग बांधवांनी अनुभवला.
या उपक्रमासाठी दिनेश पोतनीस (डोंबिवली) यांनी विमान तिकिटांचे प्रायोजकत्त्व स्वीकारले, तर चिपळूण नगरपालिका प्रशासकीय अधिकारी मंगेशजी पेढांबकर यांनी सहलीपूर्वी शुभेच्छा दिल्या. इंडिगो विमान कंपनीच्या कर्मचाऱ्यांनीही दिव्यांगांना विशेष सहकार्य केले.
गुजरातमध्ये बसचालक संजय जानी यांनी स्वतःच्या खर्चाने दिव्यांगांना शितपेय व उसाचा रस पुरवला. त्यांनी रेल्वे स्थानकापर्यंत मोफत बससेवा उपलब्ध करून दिली. सहलीदरम्यान आरएचपी फाऊंडेशनचे अध्यक्ष सादीकभाई नाकाडे यांनी दिव्यांगांना मार्गदर्शन करताना “घर सोडा, परिस्थितीत आनंद शोधा” असा संदेश दिला.
उपक्रमाच्या यशस्वीतामध्ये समिर करीम नाकाडे, लौकीक माधव सावंत, अमृता हमिद भुस्कुटे यांनी दिव्यांगांची काळजीपूर्वक वाहतूक केली. तसेच सारिका चिपळूणकर, अप्पा भोसले, दुर्गा, ओम व आरोही भुस्कुटे यांचेही सहकार्य लाभले.
हॅशटॅग्स:
#दिव्यांगांचीगगनभरारी #विमानप्रवास #दुर्गाशक्तीसंस्था #RatnagiriNews #InspiringJourney #DivyangSeva #SocialInitiative #ChiplunToRajkot
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
