संजय राऊतांचा घणाघात : “मोदी सरकारच्या हलगर्जीपणामुळे पहलगाममध्ये २६ जणांचा मृत्यू”
दोन लाख लष्करी पदे रिक्त असल्याचा दावा; सामान्यांच्या सुरक्षेऐवजी अमित शाह यांच्या ताफ्यासाठी विशेष बंदोबस्त असल्याचा आरोप
जम्मू-काश्मीरच्या पहलगाम येथे मंगळवारी (२२ एप्रिल) झालेल्या भीषण दहशतवादी हल्ल्याने संपूर्ण देश हादरला आहे. या हल्ल्यात २६ पर्यटकांचा मृत्यू झाला असून २० जण गंभीर जखमी झाले आहेत. बैसरन येथे मोठ्या प्रमाणात पर्यटकांची गर्दी असूनही तिथे कोणतीही सुरक्षा व्यवस्था नव्हती, असा आरोप केला जात आहे.
शिवसेनेचे (ठाकरे गट) नेते आणि राज्यसभा खासदार संजय राऊत यांनी या हल्ल्यानंतर केंद्र सरकारवर जोरदार टीका केली आहे. “मोदी सरकारने भारतीय लष्करातील दोन लाख पदं न भरल्यामुळे सुरक्षेचा अभाव निर्माण झाला आहे. केंद्र सरकारने काश्मीरचा विशेष दर्जा रद्द केला आणि केंद्रशासित प्रदेशात रूपांतर केलं, त्यामुळे तिथल्या सुरक्षेची जबाबदारीही सरकारवरच आहे,” असे राऊत म्हणाले.
ते पुढे म्हणाले की, “अमित शाहांसाठी श्रीनगरमध्ये शेकडो सशस्त्र जवान तैनात होते. त्यांच्या सुरक्षेसाठी ७५ गाड्यांचा ताफा, बॉम्बस्क्वाड आणि ५०० हून अधिक सशस्त्र पोलीस होते. पण पहलगामसारख्या पर्यटनस्थळी, जिथे हजारो पर्यटक होते, तिथे एकही सुरक्षारक्षक नव्हता.”
राऊत यांनी मोदी सरकारवर लष्कराच्या भरती प्रक्रियेत दुर्लक्ष केल्याचा आरोप करत म्हटले की, “संरक्षण खात्याच्या खर्चात कपात करण्यात आली आहे. ही रक्कम ‘लाडली बहन’सारख्या योजनांमध्ये वापरली जात आहे, जी थेट मतांसाठी आर्थिक लाभ देणाऱ्या योजना आहेत.”
तसंच, पंतप्रधान मोदींनी नोटबंदीनंतर दहशतवाद संपेल असे म्हटले होते, मात्र वास्तवात जम्मू-काश्मीरमध्ये दहशतवाद वाढतच असल्याचा आरोपही त्यांनी केला.
हॅशटॅग्स:
#SanjayRaut #PahalgamAttack #JammuKashmir #ModiGovernment #AmitShah #SecurityFailure #Terrorism #ShivsenaThackeray #IndianArmyVacancies #KashmirIssue
फोटो
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
