लोकनेते शामराव पेजे महाविद्यालयात लावणी महोत्सव उत्साहात संपन्न!
रत्नागिरी, [संदीप शेमणकर] – श्रमिक किसान सेवा समिती संचलित लोकनेते शामरावजी पेजे कला, वाणिज्य व विज्ञान महाविद्यालय, शिवार आंबेरे येथे राष्ट्रीय सेवा योजना (NSS) विभाग आणि नेचर क्लब यांच्या संयुक्त विद्यमाने बुधवार, ९ जुलै २०२५ रोजी ‘कृषी महोत्सव’ अंतर्गत लावणी महोत्सवाचे आयोजन करण्यात आले होते. शिवार आंबेरे येथील निसर्गवासी नंदकुमारजी मोहिते सर यांच्या शेतात हा आगळावेगळा महोत्सव संपन्न झाला.
श्रमिक किसान सेवा समितीचे संस्थापक अध्यक्ष नंदकुमारजी मोहिते सर यांचे ६ मार्च २०२५ रोजी हृदयविकाराने अकाली निधन झाले. त्यांच्या निधनाने महाविद्यालय, संस्था आणि कुटुंबियांवर दुःखाचा डोंगर कोसळला. सरांचे मन शेती संस्कृती जपवणारे होते आणि त्यांच्या कुटुंबासाठी शेती हेच उदरनिर्वाहाचे एकमेव साधन आहे. याच विचारातून, राष्ट्रीय सेवा योजना विभाग आणि नेचर क्लबने सरांच्या कुटुंबीयांना शेतीच्या कामात मदत करून आपला खारीचा वाटा उचलला.
राष्ट्रीय सेवा योजना स्वयंसेवकांनी लावणीच्या प्रात्यक्षिकातून सामूहिक कामाचा अनुभव घेतला. एकत्र काम केल्याने एकोपा आणि श्रमातून मिळणारा आनंद निसर्गात प्रत्यक्ष अनुभवता आला. सर्व स्वयंसेवकांनी याचा मनमुराद आनंद लुटला. शेताच्या बांधावर बसून अल्पोपहार खाण्याची एक अविट गोडी अनुभवता आली.
राष्ट्रीय सेवा योजना विभाग प्रमुख प्राध्यापिका कल्पना मेस्त्री आणि नेचर क्लब विभाग प्रमुख प्राध्यापिका अनुष्का लिंगायत यांच्या मार्गदर्शनाखाली, तसेच महाविद्यालयाचे प्रभारी प्राचार्य प्रमोद वारीक यांच्या प्रोत्साहनाने हा उपक्रम यशस्वीरित्या पार पडला.
#LokneteShamraoPejeCollege #LavaniMahotsav #AgriFestival #NSS #NatureClub #Agriculture #RatnagiriNews #शिवारआंबेरे #कृषीमहोत्सव #राष्ट्रीयसेवायोजना #
लावणी
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
