💥 दिवाळीनंतर स्थानिक निवडणुकांचे फटाके फुटणार!
🟣 नगराध्यक्ष पदांचे आरक्षण सोमवारी मंत्रालयात; निवडणूक पूर्व प्रक्रिया अंतिम टप्प्यात
मुंबई :
राज्यातील जिल्हा परिषद अध्यक्षपदाच्या आरक्षणानंतर आता नगरपरिषद व नगरपंचायतींच्या नगराध्यक्ष पदांचे आरक्षण सोमवारी जाहीर होणार आहे. ही सोडत मंत्रालयात काढली जाणार असून, राज्य निवडणूक आयोगाने सर्व मान्यताप्राप्त पक्षांच्या प्रतिनिधींना सोडतीसाठी उपस्थित राहण्याचे आवाहन केले आहे.
दिवाळीनंतर स्थानिक स्वराज्य संस्थांच्या निवडणुका होणार असल्याचे संकेत मिळत आहेत, आणि त्यासाठी प्रशासकीय तयारी वेगाने सुरू आहे.
राज्यातील ३२ जिल्हा परिषद व ३३६ पंचायत समित्यांच्या सार्वत्रिक निवडणुकांसाठी सदस्यपदाचे आरक्षण १३ ऑक्टोबर २०२५ रोजी सोडण्यात येणार आहे. त्यानंतर नगरपरिषद, नगरपंचायतींसाठी प्रारूप मतदार यादी ८ ऑक्टोबर २०२५ रोजी प्रसिद्ध केली जाईल.
संबंधित जिल्हाधिकारी १० ऑक्टोबर रोजी वृत्तपत्रांत आरक्षण सोडतीसंदर्भातील सूचना प्रसिद्ध करतील. त्यानंतर १४ ते १७ ऑक्टोबर दरम्यान हरकती व सूचना दाखल करता येतील, आणि ३ नोव्हेंबर २०२५ रोजी अंतिम आरक्षण शासन राजपत्रात प्रसिद्ध होईल.
राज्यातील २४७ नगरपरिषदा आणि ४२ नगरपंचायतींमध्ये थेट अध्यक्षपदाची निवडणूक घेण्यात येणार आहे. या निवडणुकांसाठी प्रभागनिहाय प्रारूप मतदार यादी ८ ऑक्टोबर रोजी प्रसिद्ध होईल. त्यावर १३ ऑक्टोबरपर्यंत हरकती व सूचना दाखल करता येतील.
राज्य निवडणूक आयोगानुसार, १ जुलै २०२५ रोजी अस्तित्वात असलेली विधानसभा मतदार यादीच या निवडणुकांसाठी वापरण्यात येणार आहे. अंतिम मतदार यादी २८ ऑक्टोबर २०२५ रोजी प्रसिद्ध होईल.
या याद्यांमध्ये मतदारांची नावे, पत्ते, दुरुस्ती, वगळणे किंवा नवीन नावे समाविष्ट करणे या प्रकारच्या कामकाजाचा निर्णय राज्य निवडणूक आयोगाकडून केला जाणार नाही, कारण या याद्या थेट विधानसभा मतदार यादीवर आधारित असतील.
—
🏷️ हॅशटॅग्स :
#नगराध्यक्षआरक्षण #स्थानिकनिवडणुका #MaharashtraElections2025 #राज्यनिवडणूकआयोग #MunicipalElections #दिवाळीनंतरफटाके
—
📸
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
