🔹पाच दिवस नव्याने रणधुमाळी रंगणार; ‘स्थानिक’ निवडणुकीत प्रचाराचा दुसरा अंक.!
न्यायालयीन प्रकरणांमुळे निवडणूक स्थगित झालेल्या नगरपालिका व नगर पंचायतच्या अध्यक्ष, सदस्य आणि काही ठिकाणी केवळ सदस्य पदांसाठी २० डिसेंबरला मतदान होणार आहे. यामध्ये अकोला जिल्ह्यातील बाळापूर, तर वाशीम जिल्ह्यातील वाशीम व रिसोड येथील काही प्रभागांचा समावेश आहे. आगामी पाच दिवसांत या ठिकाणी प्रचाराचा दुसरा अंक रंगेल. नव्याने सुरू होणाऱ्या रणधुमाळीत पुन्हा एकदा प्रचारतोफा धडाडण्याची चिन्हे आहेत.
राज्यात २४६ नगर पालिका व ४२ नगरपंचायतीसाठी राज्य निवडणूक आयोगाने ०४ नोव्हेंबर रोजी निवडणूक कार्यक्रम जाहीर केला. या कार्यक्रमानुसार नामनिर्देशनपत्रांची छाननी झाल्यानंतर निवडणूक निर्णय अधिकाऱ्यांच्या निर्णयाविरोधात न्यायालयात अपील दाखल करण्याची तरतूद आहे. अपील दाखल करण्यात आलेल्या ठिकाणी निकाल २२ नोव्हेंबरपर्यंत येणे आवश्यक होते. त्यामुळे उमेदवारास त्याचे नामनिर्देशनपत्र मागे घेण्यास तीन दिवसाचा कालावधी मिळाला असता.
काही ठिकाणी उमेदवारांना नामनिर्देशनपत्र माघारी घेण्यासाठी आवश्यक कालावधी न देताच निवडणूक चिन्ह वाटप केल्याने ही कार्यवाही नियमबाह्य ठरल्याचे निवडणूक आयोगाने स्पष्ट केले. अपील दाखल असलेल्या ठिकाणच्या निवडणुकांना आयोगाने स्थगिती दिली.
गुंड मयुर शिंदे याच्या पक्षप्रवेशासाठी उद्या भाजपचे शक्ती प्रदर्शन
अकोला जिल्ह्यातील बाळापूर नगरपालिकेची निवडणूक स्थगित झाली. बाळापूर नगरपालिकेच्या नगराध्यक्ष पदासंदर्भात न्यायालयात अपील दाखल होती. निवडणूक आयोगाच्या आदेशानुसार बाळापूरची नगराध्यक्षांसह सर्व सदस्य पदासाठीची निवडणूक स्थगित झाली. वाशीम जिल्ह्यातील वाशीम येथे नगराध्यक्ष पदासंदर्भात दाखल याचिकेवर २५ नोव्हेंबरला निकाल आल्याने त्याठिकाणीची देखील संपूर्ण निवडणूक स्थगित झाली. रिसोड नगरपालिकेतील प्रभाग ५ ब आणि प्रभाग १० अ मध्ये सदस्य पदाची निवडणूक स्थगित होती. सुधारित कार्यक्रमानुसार या ठिकाणी २० डिसेंबरला मतदान होणार आहे.
बाळापूर आणि वाशीम येथे कुठल्याही उमेदवाराने माघार घेतली नसून रिसोड येथे एक अर्ज मागे घेतला आहे. निवडणूक लांबणीवर पडल्याने उमेदवारांना प्रचारासाठी बराच कालावधी मिळाला. मात्र, खर्चाची मर्यादा असल्याने प्रचार थंडावला होता. उमेदवारांकडून भेटीगाठीवर भर देण्यात येत आहे. शिवाय हिवाळी अधिवेशनात नेते व्यस्त होते. आता पुन्हा नव्याने प्रचार सुरू होऊन शेवटच्या पाच दिवसांमध्ये प्रचार मैदान गाजण्याची शक्यता आहे.
राज्यात २४ ठिकाणी सर्वच, तर १५४ सदस्यपदांची निवडणूक
राज्यातील २६४ नगरपालिका व नगरपंचायतींच्या सार्वत्रिक निवडणुकांसाठी २ डिसेंबरला मतदान झाले. सुधारित निवडणूक कार्यक्रमानुसार २४ नगरपालिका व नगरपंचायतींच्या अध्यक्षपदांसह सर्व सदस्यपदांसाठी आणि ७६ नगरपालिका व नगरपंचायतींमधील १५४ सदस्यपदांच्या जागांसाठी २० डिसेंबर रोजी मतदान होणार आहे. सर्वच ठिकाणी २१ डिसेंबर मतमोजणी होईल.
१९ ला रात्री १० पर्यंत प्रचार
निवडणूक आयोगाच्या प्राप्त निर्देशानुसार मतदानांच्या अगोदरच्या रात्री १० वाजेपर्यंत जाहीर प्रचार करता येणार आहे, अशी माहिती नगरपालिका प्रशासनाचे सहआयुक्त डॉ. विश्वनाथ वडजे यांनी दिली.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
