रत्नायके–शानाकाच्या वादळी खेळीने श्रीलंकेचा ओमानवर १०५ धावांनी दणदणीत विजय
मुंबई (गुरुदत्त वाकदेकर) : आयसीसी पुरुष टी–२० विश्वचषक २०२६ मधील सोळाव्या सामन्यात गट ब मध्ये श्रीलंकेने ओमानचा १०५ धावांनी पराभव करत आपले वर्चस्व सिद्ध केले. पल्लेकेले आंतरराष्ट्रीय क्रिकेट स्टेडियमवर झालेल्या या सामन्यात श्रीलंकेच्या फलंदाजांनी धडाकेबाज कामगिरी करत २० षटकांत ५ गडी गमावून २२५ धावांचा भक्कम डोंगर उभारला. प्रत्युत्तरात ओमानचा डाव २० षटकांत ९ बाद १२० धावांत मर्यादित राहिला.
नाणेफेक जिंकून ओमानने प्रथम गोलंदाजीचा निर्णय घेतला. मात्र तो निर्णय श्रीलंकेच्या फलंदाजांनी सपशेल चुकीचा ठरवला. कुसल मेंडिसने संयमी ६१ धावा केल्या. पवन रत्नायकेने अवघ्या २८ चेंडूंमध्ये ६० धावांची तुफानी खेळी साकारली. कर्णधार दासून शनाकाने २० चेंडूंमध्ये ५० धावांची आक्रमक खेळी करत संघाला वेग दिला. अखेरच्या षटकांत कामिंदू मेंडिसने झटपट १९ धावा जोडल्या. या आक्रमक फलंदाजीच्या जोरावर श्रीलंकेने २२५ धावांचा डोंगर उभारला. ओमानकडून जितेन रमणंदीने २, तर जय ओडेढरा आणि सुफ्यान मेहमूद यांनी प्रत्येकी १ बळी घेतला.
२२६ धावांच्या लक्ष्याचा पाठलाग करताना ओमानची सुरुवात खराब झाली. सुरुवातीच्या षटकांतच तीन गडी बाद झाल्याने संघ अडचणीत आला. मोहम्मद नदीमने ५६ चेंडूंमध्ये ५३ धावा करत झुंज दिली. वसीम अलीने २७ धावांचे योगदान दिले. मात्र अन्य फलंदाजांना टिकून राहता आले नाही. श्रीलंकेच्या गोलंदाजांनी सातत्यपूर्ण मारा करत ओमानचा डाव २० षटकांत ९ बाद १२० धावांत रोखला.
महिश तीक्ष्णाने ४ षटकांत केवळ ११ धावा देत २ बळी घेतले. दुश्मंथा चमीरा आणि कामिंदू मेंडिस यांनी प्रत्येकी २ बळी घेतले. या भेदक गोलंदाजीमुळे श्रीलंकेला मोठा विजय मिळवता आला. उत्कृष्ट फलंदाजीसाठी पवन रत्नायकेला सामनावीर पुरस्काराने गौरवण्यात आले.
या विजयासह श्रीलंकेने गट ब मधील आपली आघाडी अधिक मजबूत केली असून स्पर्धेतील विजेतेपदाच्या शर्यतीत आपली दावेदारी अधिक भक्कम केली आहे.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
