हृदय निरोगी ठेवण्यासाठी ‘हार्टस्ट्रॉंग’ मार्गदर्शक; डॉ. कौशल छत्रपती यांचे नवे पुस्तक प्रकाशित
मुंबई (गुरुदत्त वाकदेकर) : जगभरात हृदयरोग मृत्यूचे प्रमुख कारण ठरत असताना, प्रसिद्ध इंटरव्हेन्शनल कार्डिओलॉजिस्ट डॉ. कौशल छत्रपती यांनी ‘हार्टस्ट्रॉंग (Heartstrong)’ हे नवे पुस्तक प्रकाशित केले आहे. सर्वसामान्य वाचकांसाठी तयार केलेले हे पुस्तक हृदयाच्या आरोग्याविषयी असलेले गैरसमज दूर करते आणि योग्य माहितीच्या आधारे जागरूकता निर्माण करते. आपत्कालीन स्थिती उद्भवण्यापूर्वी योग्य निर्णय घेता यावा, हा या पुस्तकाचा मुख्य उद्देश आहे.
डॉ. छत्रपती यांच्या २१ वर्षांच्या वैद्यकीय कारकिर्दीत रुग्णांकडून वारंवार विचारले जाणारे अनेक प्रश्न या पुस्तकात समाविष्ट करण्यात आले आहेत. हृदयाच्या वेदना जीवघेण्या ठरू शकतात का, मॅरेथॉनमध्ये धावणे सर्वांसाठी सुरक्षित आहे का, घरात पाळीव प्राणी असल्याने हृदयविकाराचा धोका कमी होतो का, तसेच दिवसाला एक-दोन सिगारेट ओढणे सुरक्षित आहे का, यांसारख्या प्रश्नांची सोप्या भाषेत उत्तरे देण्यात आली आहेत. या अनुभवांतूनच ‘हार्टस्ट्रॉंग’ या पुस्तकाची संकल्पना साकार झाली आहे.
एका घटनेचा उल्लेख करताना डॉ. छत्रपती सांगतात की ३९ वर्षीय एका रुग्णाला हृदयविकाराचा झटका आला होता. तातडीच्या अँजिओप्लास्टीमुळे त्याचे प्राण वाचले. मात्र त्याच्या पत्नीने विचारलेला, ‘तो इतका फिट असूनही हार्ट अटॅक कसा आला?’ हा प्रश्न समाजातील गैरसमजांचे उदाहरण आहे. फिट दिसणे म्हणजे आरोग्यदायी असणे नव्हे. सिक्स पॅक अॅब्स असूनही चुकीची जीवनशैली आरोग्यास घातक ठरू शकते. याच मानसिकतेत बदल घडवण्यासाठी हे पुस्तक लिहिले गेले आहे.
‘हार्टस्ट्रॉंग’ला डॉ. छत्रपती यांनी ‘देवाने द्यायला विसरलेले हृदयाचे ओनर मॅन्युअल’ असे संबोधले आहे. रक्तदाब, मधुमेह, लठ्ठपणा, कोलेस्ट्रॉल, धूम्रपान, ताणतणाव, झोप, आहार, सीपीआरविषयी जागरूकता आणि आधुनिक हृदयरोग उपचारांबाबतचे गैरसमज या विषयांवर पुस्तकात सविस्तर मार्गदर्शन करण्यात आले आहे. हे पुस्तक वैद्यकीय तज्ज्ञांसाठी नसून सर्वसामान्य वाचकांसाठी सोप्या आणि संवादात्मक शैलीत लिहिले गेले आहे.
जागतिक आरोग्य संघटनेनुसार दरवर्षी जवळपास १.८ कोटी मृत्यू हे हृदयरोगामुळे होतात. भारतात बदलती जीवनशैली, ताणतणाव, मधुमेह, उच्च रक्तदाब आणि धूम्रपानामुळे हृदयरोगाचे प्रमाण झपाट्याने वाढत आहे. या पार्श्वभूमीवर ‘हार्टस्ट्रॉंग’सारख्या पुस्तकाची गरज अधिक असल्याचे मत तज्ज्ञांनी व्यक्त केले आहे. ट्रुथ अँड सोशल पब्लिकेशन यांनी प्रकाशित केले आहे. हृदयाचे आरोग्य जपण्यासाठी आणि योग्य वेळी योग्य निर्णय घेण्यासाठी हे पुस्तक प्रत्येक कुटुंबासाठी उपयुक्त ठरणार आहे.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
