कोकण विभागासाठी लोकप्रतिनिधी प्रशिक्षण कार्यशाळा २७ फेब्रुवारीपासून चिपळूणमध्ये
चिपळूण : महाराष्ट्र प्रदेश काँग्रेस कमिटीच्या वतीने कोकण विभागातील लोकप्रतिनिधींसाठी विशेष प्रशिक्षण कार्यशाळेचे आयोजन करण्यात आले आहे. ही कार्यशाळा दि. २७, २८ फेब्रुवारी व १ मार्च २०२६ रोजी ‘धवल घाग, व्यापारी संकुल, चिपळूण’ येथे पार पडणार आहे.
या कार्यशाळेत निवडक लोकप्रतिनिधी सहभागी होणार असून, बदलत्या राजकीय परिस्थितीत प्रभावी भूमिका कशी पार पाडावी, जनतेच्या प्रश्नांना कशा प्रकारे सामोरे जावे, तसेच पक्ष संघटन मजबूत करण्याबाबत मार्गदर्शन करण्यात येणार आहे.
उद्घाटन समारंभ
शुक्रवार, दि. २७ फेब्रुवारी रोजी सायंकाळी ५ वाजता कार्यशाळेचे उद्घाटन मा. प्रांताध्यक्ष श्री. हर्षवर्धन सपकाळ यांच्या हस्ते होणार आहे. यावेळी माजी खासदार श्री. हुसेन दलवाई प्रमुख उपस्थित राहणार आहेत. तसेच प्रशिक्षण विभाग प्रमुख श्री. आशुतोष शिर्के शिबिराची रूपरेषा स्पष्ट करणार आहेत.
विविध विषयांवर मार्गदर्शन
शनिवार, दि. २८ फेब्रुवारी रोजी “शहरांमधील बदलते राजकारण आणि आपण”, “जनतेचे प्रश्न आणि आपली भूमिका”, तसेच “धर्म, संस्कृती आणि धर्मनिरपेक्ष राजकारण” या महत्त्वपूर्ण विषयांवर सत्रे होणार आहेत. गटानिहाय चर्चेद्वारे संवाद साधला जाणार आहे.
समारोप कार्यक्रम
रविवार, दि. १ मार्च रोजी विविध सामाजिक कार्यकर्ते व लोकप्रतिनिधींसोबत चर्चासत्र आयोजित करण्यात आले आहे. दुपारी १२ वाजता समारोप सोहळा पार पडणार असून, यावेळी मा. प्रांताध्यक्ष श्री. हर्षवर्धन सपकाळ, अखिल भारतीय काँग्रेस कमिटीचे सचिव तथा कोकण विभाग सहप्रभारी श्री. यू. बी. व्यंकटेश आणि आमदार श्री. भाई जगताप उपस्थित राहणार आहेत.
सहभागी प्रतिनिधींनी दि. २७ फेब्रुवारी रोजी दुपारी ३ वाजेपर्यंत चिपळूण येथे उपस्थित राहावे, असे आवाहन आयोजकांकडून करण्यात आले आहे. अधिक माहितीसाठी महा सचिव श्री. गुरबिंदरसिंग बच्छेर (मो. 9821441616) यांच्याशी संपर्क साधावा, असे रत्नागिरी ब्लॉक काँग्रेस कमिटी प्रभारी अध्यक्ष प्रसाद उपळेकर यांनी कळविले आहे.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
