गुहागर घरफोडीचा प्रयत्न फसला; मुंबईतील टोळीला रत्नागिरी एलसीबीने ठोकल्या बेड्या
शृंगारतळी ज्वेलर्स चोरी प्रकरण: ११.९५ लाखांच्या मुद्देमालासह ४ आरोपी गजाआड
गुहागर:
शृंगारतळी बाजारपेठेतील ‘ओंकार ज्वेलर्स’ फोडण्याचा प्रयत्न करणाऱ्या आंतरजिल्हा टोळीचा रत्नागिरी स्थानिक गुन्हे अन्वेषण शाखेने (LCB) पर्दाफाश केला आहे. या प्रकरणी मुंबईतील घाटकोपर आणि कुर्ला परिसरातून चार सराईत गुन्हेगारांना अटक करण्यात आली असून, त्यांच्याकडून गुन्ह्यात वापरलेली कार आणि इतर साहित्यासह ११ लाख ९५ हजार २०० रुपयांचा मुद्देमाल जप्त करण्यात आला आहे.
नेमकी घटना काय?
१८ फेब्रुवारी २०२६ रोजी मध्यरात्री १:३१ च्या सुमारास अज्ञात चोरट्यांनी शृंगारतळी येथील ओंकार ज्वेलर्सच्या बाहेरील शटरचे कुलूप तोडून आत प्रवेश केला होता. मात्र, आतील शटर तोडताना चोरट्यांचा प्रयत्न अयशस्वी ठरला. याप्रकरणी गुहागर पोलीस ठाण्यात भारतीय न्याय संहिता (BNS) कलम ३३१ (६), ३३१ (४) आणि ६२ अन्वये गुन्हा दाखल करण्यात आला होता.
अशी झाली अटक (आरोपींची नावे):
स्थानिक गुन्हे शाखेने सीसीटीव्ही फुटेज, तांत्रिक विश्लेषण आणि गुप्त बातमीदारांच्या मदतीने तपास करून मुंबईतून खालील चौघांना ताब्यात घेतले:
१. निशांत सुधीर आंबोकर (पंतनगर, घाटकोपर)
२. मोईन शकील शेख (घाटकोपर)
३. सुमित कुलदीप चुनियाना (कुर्ला)
४. आयुष जितेंद्र घागडा (घाटकोपर)
पोलिसांची मोठी कारवाई
रत्नागिरी पोलीस अधीक्षक नितीन बगाटे आणि अप्पर पोलीस अधीक्षक बी.बी. महामुनी यांच्या मार्गदर्शनाखाली ही यशस्वी कारवाई करण्यात आली. एलसीबीचे पोलीस निरीक्षक नितीन ढेरे, संदीप ओगले आणि त्यांच्या पथकाने अत्यंत चाणाक्षपणे तांत्रिक पुराव्यांच्या आधारे आरोपींच्या मुसक्या आवळल्या.
> तपास पथक: विजय आंबेकर, गणेश सावंत, दिपराज पाटील, योगेश नार्वेकर आणि चालक अतुल कांबळे या कर्मचाऱ्यांनी या कारवाईत मोलाची भूमिका बजावली.
पुढील तपासासाठी आरोपींना गुहागर पोलिसांच्या स्वाधीन करण्यात आले असून, या टोळीने अन्य कुठे घरफोड्या केल्या आहेत का, याचा तपास आता पोलीस करत आहेत.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
