हुंड्यासाठी गर्भवती विवाहितेचा छळ; पती आणि सासूला १० वर्षांची सक्तमजुरीची शिक्षा
चिपळूण न्यायालयाचा महत्त्वपूर्ण निकाल; ६ महिन्यांच्या गर्भवतीच्या आत्महत्येप्रकरणी कठोर निर्णय
चिपळूण : हुंड्यासाठी छळ करून ६ महिन्यांच्या गर्भवती विवाहितेला आत्महत्येस प्रवृत्त केल्याप्रकरणी चिपळूण जिल्हा न्यायालयाने पती आणि सासूला प्रत्येकी १० वर्षे सक्तमजुरी व दंडाची शिक्षा सुनावली आहे. जिल्हा न्यायाधीश डॉ. अनिता एस. नेवसे यांनी शनिवार, २ मे रोजी हा महत्त्वपूर्ण निकाल दिला.
तालुक्यातील डेरवण येथील काव्या दिनेश कदम (वय २५) हिने २१ नोव्हेंबर २०१६ रोजी घराशेजारील विहिरीत उडी मारून आत्महत्या केली होती. या प्रकरणी तिचा पती दिनेश महादेव कदम (वय ३४) आणि सासू मीनाक्षी महादेव कदम (वय ५७) यांच्याविरोधात गुन्हा दाखल करण्यात आला होता.
न्यायालयात सिद्ध झालेल्या माहितीनुसार, विवाहानंतर काही महिन्यांतच पती दिनेश कदम याने गाडी घेण्यासाठी माहेरहून १ लाख रुपये आणण्याचा तगादा लावला होता. मागणी पूर्ण न झाल्याने काव्याला सतत मानसिक व शारीरिक छळ सहन करावा लागत होता.
तिला मारहाण करणे, घराबाहेर काढणे, अपमानित करणे तसेच गर्भवती असतानाही कठोर कामे करण्यास भाग पाडणे असे प्रकार सातत्याने सुरू होते. या सततच्या छळामुळे तिचे जीवन असह्य झाले आणि अखेर तिने आत्महत्येचा मार्ग स्वीकारला.
या प्रकरणी सावर्डे पोलिस ठाण्यात भारतीय दंड विधान कलम ४९८(अ), ३०६ सह ३४ अंतर्गत गुन्हा दाखल करण्यात आला होता.
सरकारी वकील प्रफुल्ल साळवी यांनी एकूण ८ साक्षीदार तपासून न्यायालयात प्रभावी युक्तिवाद मांडला. त्यामध्ये काव्याची आई, भाऊ, शेजारी तसेच तपास अधिकारी यांच्या साक्षी महत्त्वाच्या ठरल्या.
शिक्षा कमी करण्याची आरोपींची मागणी न्यायालयाने फेटाळून लावली. आत्महत्या करणारी काव्या ६ महिन्यांची गर्भवती असल्याने या घटनेत दोन निष्पाप जीव गमावले गेल्याचे नमूद करत न्यायालयाने कठोर भूमिका घेतली.
न्यायालयाने आरोपींना कलम ३०६ अंतर्गत १० वर्षे सक्तमजुरी व प्रत्येकी २५ हजार रुपये दंड, तसेच कलम ४९८(अ) अंतर्गत ३ वर्षे सक्तमजुरी व प्रत्येकी १० हजार रुपये दंड अशी शिक्षा सुनावली. दंड न भरल्यास अतिरिक्त कारावास भोगावा लागणार आहे.
या प्रकरणाचा तपास पोलिस निरीक्षक शरद कुवेस्कर व सचिन इंगोले यांनी केला. हवालदार मिनाद कांबळे यांनी पैरवी म्हणून काम पाहिले.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
