श्री देव गोपाळकृष्ण माध्यमिक विद्यालयात शाळा प्रवेशोत्सव जल्लोषपूर्ण वातावरणात साजरा
गुहागर विद्यालयात नवागत विद्यार्थ्यांचे पुष्पवृष्टी, बँड पथकाच्या तालावर स्वागत; मान्यवरांच्या हस्ते पाठ्यपुस्तकांचे वाटप
गुहागर : श्री देव गोपाळकृष्ण माध्यमिक विद्यालय, गुहागर येथे नवीन शैक्षणिक वर्षाच्या प्रारंभी शाळा प्रवेशोत्सव अत्यंत उत्साहपूर्ण आणि नाविन्यपूर्ण पद्धतीने साजरा करण्यात आला. विद्यार्थ्यांच्या स्वागतासाठी विद्यालय परिसर रंगीबेरंगी फुलांनी सजवण्यात आला होता. नैसर्गिक सजावटीसह उभारण्यात आलेली आकर्षक कमान सर्वांचे लक्ष वेधून घेत होती.
या कार्यक्रमाला गुहागर केंद्राचे केंद्रप्रमुख डॉ. मनोज पाटील, गुहागर विद्यालयाच्या ९१ वर्षांच्या इतिहासात प्रथमच लाभलेल्या विद्यमान मुख्याध्यापिका सौ. सुजाता कांबळे, पर्यवेक्षिका सौ. गायत्री कनगुटकर, गंगावणे सर, पालक सौ. नाटेकर मॅडम, श्री. साळवी, श्री. मोहिते सर, तांबट मॅडम, गमरे सर, पावसकर मॅडम, साबळे सर, विद्यालयातील विद्यार्थी तसेच मोठ्या संख्येने पालक उपस्थित होते.
विद्यालयात प्रथमच प्रवेश घेणाऱ्या विद्यार्थ्यांचे बँड पथकाच्या तालावर वाजत-गाजत उत्स्फूर्त स्वागत करण्यात आले. पुष्पवृष्टी करत विद्यार्थ्यांना प्रवेशद्वारापर्यंत आणण्यात आले. यावेळी पर्यवेक्षिका सौ. गायत्री कनगुटकर व तांबट मॅडम यांनी विद्यार्थ्यांचे औक्षण करून स्वागत केले. सर्व विद्यार्थ्यांना खाऊचे वाटप करण्यात आले.
कार्यक्रमाचे सूत्रसंचालन गमरे सर यांनी केले. उपस्थित मान्यवर व पालकांच्या हस्ते विद्यार्थ्यांना पाठ्यपुस्तकांचे वाटप करण्यात आले.
शाळा प्रवेशोत्सवाचे नाविन्यपूर्ण आणि यशस्वी आयोजन केल्याबद्दल केंद्रप्रमुख डॉ. मनोज पाटील यांनी विद्यालयाचे कौतुक करत समाधान व्यक्त केले.
SEO Keywords:
श्री देव गोपाळकृष्ण माध्यमिक विद्यालय गुहागर, शाळा प्रवेशोत्सव, गुहागर बातम्या, Ratnagiri News, नवीन शैक्षणिक वर्ष, विद्यार्थी स्वागत कार्यक्रम, गुहागर शिक्षण बातमी
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
