राष्ट्रवादी शरदचंद्र पवार पक्षाच्या विधीमंडळ गटनेतेपदी जितेंद्र आव्हाडांची निवड; रोहित पाटलांवर पहिल्यांदाच मोठी जबाबदारी
मुंबई– विधानसभा निवडणुकीच्या निकालानंतर राष्ट्रवादी शरद पवार गट कामाला लागला आहे. विधानसभा निवडणुकीनंतर शरद पवार गटाने आमदारांची बैठक बोलावली होती. या बैठकीत जिंतेद्र आव्हाड, रोहित आर आर पाटील आणि उत्तम जानकर यांच्यावर मोठी जबादारी सोपवण्यात आली आहे. या तिन्ही नेत्यांवर जबाबदारी सोपवण्याची माहिती जयंत पाटील यांनी दिली. तिन्ही नेत्यांकडे मोठी जबाबदारी देऊन राष्ट्रवादी काँग्रेसने भाकरी फिरवल्याची चर्चा राजकीय वर्तुळात सुरु झाली आहे.
विशेष म्हणजे नवनिर्वाचित आमदार आणि दिवंगत नेते आर.आर.पाटील यांचे सुपूत्र, देशातील सर्वात तरुण आमदार असलेले रोहित पाटील यांच्यावर मोठी जबाबदारी सोपवण्यात आली आहे. शरद पवारांनी रोहित पाटील यांना लहान वयात मोठी जबाबदारी सोपवल्याचं दिसून येत आहे. मुख्य प्रतोदपदी रोहित पाटील यांची निवड करण्यात आली असून उत्तम जानकार यांची प्रतोदपदी निवड करण्यात आली आहे. विधीमंडळ पक्षाच्या नेत्यांबाबत आज निर्णय झालेला नाही. पुढील बैठकीत विधीमंडळ पक्षाच्या नेत्याबाबत निर्णय घेण्यात येणार आहे.
शरद पवार यांच्या राष्ट्रवादी काँग्रेसने नवनिर्वाचित आमदारांची बैठक आयोजित केली होती. या बैठकीत पक्षाकडून महत्वाचे निर्णय घेण्यात आले. या बैठकीत विधीमंडळात गटनेतापदी जितेंद्र आव्हाड, मुख्य प्रतोदपदी रोहित आर आर पाटील, प्रतोद म्हणून उत्तम जानकर यांची नेमणूक करण्यात आली. शरद पवार गटाच्या बैठकीनंतर जयंत पाटील यांनी पत्रकार परिषद घेतली. या पत्रकार परिषदेत जयंत पाटील म्हणाले, ‘विधिमंडळ नेता आज निवडला गेला नाही. संदीप क्षीरसागर आज उपस्थित नव्हते. आमची संख्या जरी कमी असली तरी आम्ही लोकांचे प्रश्न मांडू. मतदानाच्या दिवशी ५ वाजल्यानंतर मतदान कसं वाढलं, याबाबत सर्वांनी चिंता व्यक्त केली. फॉर्म १७ आणि मतांची आकडेवारी जुळत नसेल तर हे फार गंभीर आहे.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
